शिर्डी : भारतीय जनता पक्ष हा आपल्या जुन्या, निष्ठावान आणि प्रामाणिक कार्यकर्त्यांचा पक्ष असून, कोणत्याही परिस्थितीत कार्यकर्त्यांनी खचून न जाता पक्षाच्या विचारांशी एकनिष्ठ राहून काम करत राहावे. भाजप आपल्या प्रत्येक निष्ठावान कार्यकर्त्याच्या पाठीशी आजही ठामपणे उभा आहे आणि भविष्यातही राहील, असा विश्वास विधानपरिषदेचे सभापती प्रा. रामजी शिंदे यांनी व्यक्त केला.
शिर्डी येथील भाजप नेते डॉ. राजेंद्र पिपाडा यांच्या निवासस्थानी झालेल्या सदिच्छा भेटीदरम्यान कार्यकर्त्यांशी संवाद साधताना प्रा. शिंदे बोलत होते. यावेळी उपस्थित कार्यकर्त्यांना मार्गदर्शन करताना त्यांनी पक्षनिष्ठा, संयम आणि सातत्यपूर्ण कार्य यालाच यशाचा खरा मंत्र असल्याचे सांगितले.
प्रा. रामजी शिंदे म्हणाले, “राजकारणात प्रत्येकाची वेळ येत असते. त्यामुळे कोणत्याही अडचणींना न घाबरता, निराश न होता आणि कोणतीही अपेक्षा न ठेवता पक्षासाठी प्रामाणिकपणे कार्य करत राहणे हीच खऱ्या कार्यकर्त्याची ओळख आहे. भारतीय जनता पक्ष आपल्या निष्ठावान कार्यकर्त्यांना नेहमीच बळ देत आला असून भविष्यातही त्यांच्यासोबत खंबीरपणे उभा राहील.”
यावेळी डॉ. राजेंद्र पिपाडा यांचे वडील तथा प्रगतशील शेतकरी मदनलालजी पिपाडा यांनी शेती क्षेत्रातील अनुभव मांडत कृषीविषयक विविध मुद्द्यांवर प्रा. रामजी शिंदे यांच्याशी सविस्तर चर्चा केली. बदलते कृषी तंत्रज्ञान, शेतकऱ्यांसमोरील आव्हाने आणि सहकार क्षेत्राची भूमिका यावरही मनमोकळा संवाद झाला.
होऊ घातलेल्या अहिल्यानगर जिल्हा मध्यवर्ती सहकारी बँकेच्या निवडणुकीच्या पार्श्वभूमीवर डॉ. राजेंद्र पिपाडा यांनी प्रा. रामजी शिंदे यांना शुभेच्छा देत त्यांच्या यशासाठी सदिच्छा व्यक्त केल्या.
यावेळी भाजप नेते डॉ. राजेंद्र पिपाडा यांनी प्रा. रामजी शिंदे यांचा शाल देऊन सन्मान केला.
या प्रसंगी शिर्डीचे माजी नगराध्यक्ष शिवाजीराव गोंदकर, प्रथम लोकनियुक्त माजी नगराध्यक्षा सौ. ममता पिपाडा, संघपती अनिल पिपाडा, माजी विश्वस्त सचिन तांबे, प्रगतशील शेतकरी मदनलालजी पिपाडा, भाजप पदाधिकारी नरेश सुराणा, चेतन कोते, श्रुती पिपाडा, साहील पिपाडा यांच्यासह अनेक मान्यवर आणि कार्यकर्ते उपस्थित होते.
