कोपरगाव – महाविद्यालयात प्रवेशासाठी विद्यार्थ्यांना आवश्यक असलेली आदिवासी प्रमाणपत्रे व रहिवासी प्रमाणपत्र मिळवण्यासाठी मोठी धावपळ होत असते. परंतु अहिल्यानगर जिल्हाधिकारी डॉ. पंकज आशिया यांच्या संकल्पनेनुसार व तहसीलदार महेश सावंत यांच्या मार्गदर्शनाखाली, कोपरगाव तहसील कार्यालयाद्वारे आवश्यक शैक्षणिक कागदपत्रे २४ तासांत उपलब्ध करून दिली जात आहेत. या उपक्रमांतर्गत करंजी शाळेत विद्यार्थ्यांच्या कागदपत्रांची पूर्तता करत शाळेतच दाखले वाटप करण्यात आले, ज्याबद्दल नायब तहसीलदार प्रफुल्लीता सातपुते यांनी कौतुक व्यक्त केले.
२. १४१ विद्यार्थ्यांचे दाखले वाटप
मंगळवार, १४ ऑक्टोबर रोजी कर्मवीर शंकरराव काळे विद्यालय, करंजी येथे १४१ विद्यार्थ्यांचे अधिवास प्रमाणपत्र व १४१ विद्यार्थ्यांचे राष्ट्रीयत्व दाखले नायब तहसीलदार सातपुते यांच्या शुभहस्ते वितरित करण्यात आले. यावेळी राज्य पत्रकार संघाचे तालुका सचिव प्रा. विजय कापसे, सरपंच रवींद्र आगवन, स्कूल कमिटी सदस्य, पोलीस पाटील, शाळेचे मुख्याध्यापक आणि पालक उपस्थित होते.
३. शिक्षकांचा सन्मान – कौतुकाचा क्षण
सदर कार्यक्रमात नुकताच राज्य शासनाचा आदर्श कला शिक्षक पुरस्कार प्राप्त संदीप चव्हाण व संत गाडगेबाबा विद्यापीठातून अर्थशास्त्र विभागात पीएचडी प्राप्त करणार्या डॉ. ज्ञानोबा चव्हाण यांचा सन्मान करण्यात आला. कार्यक्रमाचे अध्यक्ष कारभारी आगवन यांनी शाळेने राबवलेल्या उपक्रमाचे कौतुक करत सर्व शिक्षकांचे अभिनंदन केले.
४. कार्यक्रमाची यशस्वी अंमलबजावणी
कार्यक्रमाचे प्रास्ताविक शालेय शिक्षक राधाकिसन टाकसाळ यांनी केले, सूत्रसंचालन सचिन डांगे यांनी पाहिले, तर आभार धनराज ठाकरे यांनी मांडले. शाळेतील शिक्षक, शिक्षकेत्तर कर्मचारी व विद्यार्थी यांनी अथक परिश्रम घेत कार्यक्रम यशस्वी करण्यात मोठा हातभार लावला.
🌟 चौकट
महाराष्ट्र राज्य पत्रकार संघाच्या वतीने तालुकाध्यक्ष जनार्दन जगताप यांच्या संकल्पनेतून तालुका सचिव प्रा. विजय कापसे व मान्यवरांच्या शुभहस्ते आदर्श कला शिक्षक संदीप चव्हाण व पीएचडी प्राप्त डॉ. ज्ञानोबा चव्हाण यांना सन्मानपत्र देऊन गौरविण्यात आले.
