रविवारी सकाळी साडे दहाच्या सुमारास एका व्यक्तीनं दरीत असलेल्या खाडीमध्ये एक मृतदेह पाहिला. त्यानं याची माहिती उद्यानाच्या रेंजर्सना दिली. त्यांनी तातडीनं शोध सुरु केला. हेलिकॉप्टर्सच्या मदतीनं मृतदेहाचा शोध घेण्यात आला. दहापेक्षा अधिक रेंजर्स शोधकार्यात सहभागी झाले होते. सिद्धांतचा मृतदेह सापडल्यानंतर त्याच्या कुटुंबियांनी रेंजर्स आणि अमेरिकेतीस भारतीय समुदायाच्या नेत्यांचे आभार मानले. सिद्धांतचा मृतदेह लवकरच भारतात आणला जाईल.सिद्धांत त्याच्या आई वडिलांचा एकुलता एक मुलगा होता. त्यांचं कुटुंब पुण्यातील विशालनगरात वास्तव्यास आहे. सिद्धांत २०२० पासून अमेरिकेत राहत होता. तो कॅलिफॉर्निया विद्यापीठातून एम एस करत होता. २०२३ पासून तो एका सॉफ्टवेअर कंपनीत कार्यरत होता. सिद्धांत पाटीलचे वडील गेल्याच वर्षी राज्य सरकारच्या सिंचन विभागातून निवृत्त झाले. त्याची आई गृहिणी आहे.
