जागतिक कीर्तीचे देवस्थान असलेल्या शिर्डीतील साईमंदिर परिसरात, भाविकांच्या गर्दीचा गैरफायदा घेत स्वतःच्या अल्पवयीन मुलांकडून भिक्षा मागवून व वस्तू विक्री करून घेणाऱ्या पालकांवर प्रशासनाने अखेर कारवाईचा बडगा उगारला आहे. या विशेष शोध मोहिमेत १० मुले व ४ मुली अशा १४ बालकांची सुटका करून त्यांना सुरक्षिततेसाठी बालसुधारगृहात दाखल करण्यात आले आहे.
😔 पैशासाठी पोरं, शिक्षणावर कुऱ्हाड
दररोज लाखो भाविक साईबाबांच्या दर्शनासाठी शिर्डीत येतात. मंदिर परिसरात फोटो, मूर्ती, हार-फुले, प्रसाद विक्री, कपाळावर गंध लावणे असे विविध व्यवसाय सुरू असतात. मात्र काही पालकांनी केवळ आर्थिक फायद्यासाठी आपल्या पोटच्या गोळ्यांनाच अर्थार्जनाचे साधन बनवले.
या मुलांवर शारीरिक कष्ट तर लादले जात होतेच, पण शाळा, शिक्षण आणि बालपणापासूनही त्यांना वंचित ठेवले जात होते, हे प्रशासनाच्या निदर्शनास आले.
🔍 दोन तासांची मोहीम, मोठा परिणाम
या गंभीर प्रकाराला आळा घालण्यासाठी ५ फेब्रुवारी २०२५ रोजी सकाळी १० ते १२ या वेळेत शिर्डी पोलीस ठाणे, साईबाबा संस्थान आणि शिर्डी नगरपरिषद यांच्या संयुक्त विद्यमाने विशेष शोध मोहीम राबवण्यात आली.
या कारवाईदरम्यान शाळेत न जाता मंदिर परिसरात काम करणारी १० मुले व ४ अल्पवयीन मुली आढळून आल्या.
⚖️ पालकांवर गुन्हे, मुलांना संरक्षण
बालकांची काळजी व संरक्षण अधिनियम २०१५ (सुधारित २०११) मधील कलम २(१४) नुसार संरक्षणाची गरज असल्याने या १४ बालकांना ताब्यात घेण्यात आले.
त्याचबरोबर पालकांविरोधात बालन्याय अधिनियमान्वये शिर्डी पोलीस ठाण्यात गुन्हा (रजि. नं. ८२/२२६) दाखल करण्यात आला आहे.
बालकल्याण समितीच्या आदेशानुसार या मुलांची श्रीरामपूर, संगमनेर व राहुरी येथील बालसुधारगृहात रवानगी करण्यात आली.
🌼 साईमंदिर परिसरात दिलासा
या धडक कारवाईनंतर साईमंदिर परिसरात अनधिकृत विक्रेते व भिक्षेकर्‍यांचा शुकशुकाट दिसून येत असून, भाविकांनीही प्रशासनाच्या या कारवाईचे स्वागत केले आहे.
👮♂️ वरिष्ठांच्या मार्गदर्शनाखाली कारवाई
ही संपूर्ण कारवाई जिल्हा पोलीस प्रमुख सोमनाथ घार्गे, अपर पोलीस अधीक्षक सोमनाथ वाकचौरे, उपविभागीय अधिकारी अमोल भारती यांच्या मार्गदर्शनाखाली
पोलीस निरीक्षक रणजीत गलांडे, पोलीस उपनिरीक्षक सागर काळे व शिर्डी पोलीस दलाने यशस्वीपणे पार पाडली.
