शिर्डी | प्रतिनिधी
साईबाबांच्या पावन चरणी नतमस्तक होत “शिर्डी माझे पंढरपूर” या श्रद्धेने दर महिन्याच्या शुद्ध एकादशीला साई हरी नामाचा गजर शिर्डी नगरीत घुमत असतो. सद्गुरू श्री साईबाबांच्या कृपेने आणि ह.भ.प. काशिकानंद महाराज यांच्या मार्गदर्शनाखाली समस्त शिर्डी ग्रामस्थ व साईभक्तांच्या वतीने आयोजित करण्यात येणारा सार्वजनिक किर्तन सोहळा यंदाही भक्ती, श्रद्धा आणि नामस्मरणाच्या वातावरणात पार पडणार आहे.
या पवित्र सोहळ्यात साई व विठ्ठल भक्तीचा सुरेख संगम अनुभवायला मिळणार असून, ह.भ.प. दिनेश महाराज कडव (रोहा, रायगड) आपल्या उर्जित, ओजस्वी आणि सुश्राव्य वाणीतून साई हरी नामाचे महत्त्व, साईबाबांची शिकवण, नामस्मरणाची शक्ती तसेच भक्तीमार्गाचा संदेश भाविकांपर्यंत पोहोचवणार आहेत. त्यांच्या किर्तनातून भक्तांच्या मनात अध्यात्मिक चैतन्य निर्माण होऊन संपूर्ण परिसर भक्तिरसात न्हाऊन निघणार आहे.
हा ५१ वा किर्तन सेवा सोहळा बुधवार, दिनांक ३१ डिसेंबर २०२५ रोजी सायंकाळी ७.०० ते रात्री ९.०० वाजेपर्यंत आयोजित करण्यात आला आहे. किर्तनासाठी साई निर्माण करिअर अॅकॅडमी ग्राऊंड, श्रीकृष्णनगर, शिर्डी हे स्थळ निश्चित करण्यात आले आहे. एकादशीचे औचित्य साधून साईनामाचा गजर, हरिनामाचा जयघोष आणि टाळ-मृदंगाच्या निनादात भक्तीचा अखंड प्रवाह वाहणार आहे.
किर्तनानंतर परंपरेनुसार सर्व भाविकांसाठी खिचडी प्रसादाचे वितरण करण्यात येणार असून, हा प्रसाद साईबाबांच्या कृपेचे प्रतीक मानला जातो. भाविकांनी मोठ्या संख्येने उपस्थित राहून या पवित्र प्रसादाचा लाभ घ्यावा, असे आवाहन करण्यात आले आहे.
या भक्तिमय कार्यक्रमाचे स्वागतोत्सुक श्री विजयराव कोते पाटील व समस्त शिर्डी ग्रामस्थ, साईभक्त शिर्डी असून, शिर्डी परिसरातील भाविकांमध्ये या किर्तन सोहळ्याबाबत उत्साहाचे वातावरण निर्माण झाले आहे. साईबाबांच्या भक्तीतून समाजात एकोपा, सद्भावना आणि नैतिक मूल्यांचा प्रसार व्हावा, हा या उपक्रमामागील मुख्य उद्देश असल्याचे आयोजकांनी सांगितले.
साईबाबांच्या कृपेने, विठ्ठलाच्या नामस्मरणाने आणि भक्तांच्या उपस्थितीत हा किर्तन सोहळा आध्यात्मिक उंची गाठेल, असा विश्वास भाविकांकडून व्यक्त केला जात आहे.
रामकृष्ण हरी ॥ रामकृष्ण हरी ॥ 🙏
