शिर्डी (प्रतिनिधी)
श्रीरामपूर शहरात बुधवारी श्रीरामपूर शहर पोलिसांनी ४ किलोचा गांजा पकडल्यानंतर गुरुवार दि. ८ मे रोजी राहात्यातील राहाता शिर्डी रोडवर स्थानिक गुन्हेशाखेने कारवाई करत इको स्पोर्ट कारमधील १३ किलो गांजासह एकाला रंगेहाथ पकडले असून या कार मागील दुसरी स्विफ्ट कार पोलिसांची चाहूल लागल्याने पसार झाली आहे.
स्थानिक गुन्हे शाखेच्या पथकांनी गुरुवारी दुपारी राहाता-शिर्डी रोडवर साकुरी जवळील समाधान हॉटेल येथे सापळा रचून इको स्पोर्ट कार क्र. एम.एच.१५ ईक्यु ९९२२ ही आडवली असता त्या
कारमागे असलेली दुसरी स्विफ्ट कार पोलिसांनी थांबवण्याचा प्रयत्न केला असता पोलिसांची चाहूल लागताच त्यांनी जोरात कार पळवून नेली आहे.
पकडलेल्या इको स्पोर्ट कारमध्ये १३ किलो ३१८ ग्रॅम अंमली पदार्थ (गांजा) आढळून आला असून अरुण मोतीलाल विश्वकर्मा वय ४५ रा. गितराम सोसायटी, दत्तमंदिर नाशिक रोड, नाशिक याला ताब्यात घेतले आहे. पकडलेल्या अरुण विश्वकर्मा याने ओडिसा राज्यातून नशेकरिता विक्रीसाठी गांजा आणल्याचे सांगितले. तसेच ४० किलो गांजासह स्विफ्टमध्ये पसार झालेले साथीदार नितीन उर्फ अण्णा जाधव रा. निमगाव कोराळे,साईनाथ उर्फ शिरीष गायकवाड रा. शिर्डी यांच्यासह कारचालक असल्याचे त्याने सांगितले.
ओडिसा राज्यातून जयराम (पूर्ण नाव माहित नाही) याच्याकडून विक्रीसाठी ४० किलो गांजा आणल्याची माहिती त्याने दिली. या प्रकरणी राहाता पोलिसात गुन्हा दाखल करण्यात आला असून पुढील तपास राहाता पोलिस करीत आहे. सदरची कारवाई अप्पर पोलिस अधिक्षक वैभव कलुबर्मे, उपविभागीय पोलीस अधिकारी शिरीष वमने यांच्या मार्गदर्शनाखाली अधिकारी कर्मचाऱ्यांनी केली आहे.
