शिर्डी | प्रतिनिधी
प्रेमसंबंध, सततचे वाद आणि दुसऱ्या लग्नाची तयारी… या सगळ्याचा शेवट एका तरुणीच्या निर्घृण हत्येत झाला. राहाता तालुक्यात 2023 मध्ये घडलेल्या गाजलेल्या खून प्रकरणात राहाता जिल्हा व सत्र न्यायालयाने आरोपी अजय राजेंद्र म्हस्के याला जन्मठेपेची शिक्षा सुनावली आहे. न्यायालयाने आरोपीस 10 हजार रुपयांचा दंडही ठोठावला.
सावळीविहीर येथील आरोपी अजय म्हस्के याचे विवाहित महिला सविता सुनील बोरसे हिच्यासोबत मागील तीन वर्षांपासून अनैतिक संबंध होते. सविता मूळची नाशिक जिल्ह्यातील एकलहरे येथील असून ती सध्या राहाता तालुक्यातील रुई येथील भोपळे वस्तीवर राहत होती. दोघेही एकत्र राहत असताना आरोपी अजय हा दुसरे लग्न करण्याच्या तयारीत असल्याने त्यांच्या नात्यात सतत वाद सुरू होते.
मृत सविता हिने आरोपीच्या त्रासाबाबत त्याच्या कुटुंबीयांकडे, माहेरच्यांकडे तसेच राहाता पोलीस ठाण्यातही तक्रारी केल्या होत्या. मात्र या तक्रारींचाच राग मनात धरून आरोपीने 16 जुलै 2023 रोजी धारदार चाकूने सविता हिच्या गळ्यावर सपासप वार करत तिचा खून केला. रक्ताच्या थारोळ्यात पडलेल्या सविताचा जागीच मृत्यू झाला होता. या घटनेनंतर परिसरात मोठी खळबळ उडाली होती.
या प्रकरणी शिर्डी पोलीस ठाण्यात गुन्हा रजिस्टर नं. 615/2023 भारतीय दंड विधान कलम 302 अन्वये गुन्हा दाखल करण्यात आला होता. पोलिसांनी आरोपीला तात्काळ अटक करून तपासाची चक्रे वेगाने फिरवली. तत्कालीन पोलीस निरीक्षक नंदकुमार दुधाळ, पोलीस निरीक्षक सोपान शिरसाठ, सहाय्यक पोलीस निरीक्षक संभाजी पाटील, पोहेकॉ. संदीप गडाख आणि पोकॉ कैलास राठोड यांनी तपास पूर्ण करून न्यायालयात भक्कम दोषारोपपत्र सादर केले.
या खटल्याची सुनावणी मा. जिल्हा व सत्र न्यायाधीश राजेश एस. गुप्ता यांच्या न्यायालयात झाली. सरकारी पक्षातर्फे अॅड. व्ही. डी. पानगव्हाणे आणि अॅड. सीमा देशपांडे यांनी प्रभावी युक्तिवाद केला. अखेर न्यायालयाने आरोपी अजय म्हस्के यास दोषी ठरवत जन्मठेप व दंडाची शिक्षा सुनावली.
या खटल्यात मा. पोलीस अधीक्षक मुमक्का सुदर्शन, अपर पोलीस अधीक्षक सोमनाथ वाघचौरे, उपविभागीय पोलीस अधिकारी अमोल भारती यांच्या मार्गदर्शनाखाली पोलीस निरीक्षक रणजित गलांडे, कोर्ट अंमलदार पोहेकॉ. सुभाष माळी, पोकॉ विशाल शिराळकर आणि पोहेकॉ. बनकर यांनी विशेष परिश्रम घेतले.
