शिर्डी ( प्रतिनिधी). आंतरराष्ट्रीय तीर्थक्षेत्र असणाऱ्या शिर्डी येथील श्री साईबाबा संस्थान मध्ये असणाऱ्या कर्मचारी यांच्याकडून शिर्डीत संस्थान परिसरात साईभक्तांचे गहाळ झालेले, हरवलेले पाकीटे, दागिने प्रामाणिकपणे त्यांना परत केले जात असून ही परंपरा कौतुकास्पद आहे. असे साईभक्तांकडून आता बोलले जात आहे.
शिर्डीत आतापर्यंत अनेक साईभक्त यांचे पाकीट हरवली, दागिने गहाळ झाले. मात्र ते कर्मचाऱ्यांना स्वच्छता करताना किंवा इतरत्र सापडले असता त्यांनी ते प्रामाणिकपणे आपल्या अधिकाऱ्यांकडे जमा केले. अधिकाऱ्यांनी ओळख पटवून त्या साई भक्तांना ते प्रामाणिकपणे परत केले. अशा प्रामाणिकपणे वागणाऱ्या कर्मचाऱ्यांचा साई संस्थांनच्या तर्फे सन्मानही करण्यात येतो.
दिनांक 28/10/2024. रोजीही शिर्डीत साईगुरुस्थान मंदिर परिसरात येथे ड्युटीला असणारी महिला सुरक्षा रक्षक श्रीमती बेबीताई नागरे यांना 27520/- रु सापडले. त्यांनी प्रामाणिकपणे संरक्षण ऑफिसला ते परत केले. ऑफिस मधील अधिकाऱ्यांनी चौकशी केली असता ते पैसे साईभक्त शारदा शामसुंदर( चेन्नई) यांचे असल्याचे समजल्याने ते ओळख पटवून त्या साई भक्तांना परत केले.
बेबीताई नागरे ह्या अतिशय प्रामाणिक कर्मचारी आहेत. यापूर्वी देखील त्यांना वीस हजार रु. सापडले होते. त्यावेळीही त्यांनी ते परत केले होते. त्या कोपरगाव वरून येजा करतात, वय झालेले आहे, परंतु आपली ड्युटी अतिशय प्रामाणिक करतात. अश्या प्रामाणिक कर्मचाऱ्यामुळे साईबाबा संस्थानचे भक्तांमध्ये नावलौकिक वाढते.
संस्थान कर्मचाऱ्यांचा हा प्रामाणिकपणा साई भक्तांद्वारे देशात परदेशातही पोहोचला जातो. अशा प्रामाणिक कर्मचाऱ्यांचा संस्थानही यथोचित सत्कार करून त्यांच्या प्रामाणिक पणाचे कौतुक केले जाते. श्रीमती बेबीताई नागरे यांचा ही साईसंस्थांन तर्फे सन्मान करून त्यांचे कौतुक होत आहे.
