शिर्डी | प्रतिनिधी
साईबाबांच्या शिर्डीत पुन्हा एकदा भरदिवसा चैन स्नॅचिंगची धक्कादायक घटना घडली असून त्यामुळे नागरिकांमध्ये भीतीचे वातावरण निर्माण झाले आहे. साईनगर परिसरात घरासमोर उभ्या असलेल्या महिलेच्या गळ्यातील सुमारे १ लाख २ हजार रुपये किमतीची सोन्याची चैन दोन अज्ञात चोरट्यांनी क्षणार्धात हिसकावून नेल्याची घटना सोमवारी (दि.१५) दुपारी घडली.
याबाबत शिर्डी पोलीस ठाण्यात भारतीय न्याय संहिता कलम ३०३(५) अन्वये गुन्हा दाखल करण्यात आला आहे. यशोदा भगवान ठाकरे (वय ५२, रा. साईनगर, शिर्डी) यांनी याप्रकरणी फिर्याद दिली आहे.
पोलिसांनी दिलेल्या माहितीनुसार, यशोदा ठाकरे या आपल्या घरासमोर उभ्या असताना एक अनोळखी इसम पायी चालत त्यांच्या जवळ आला. त्याने अचानक त्यांच्या गळ्यातील सुमारे ३ ग्रॅम वजनाची सोन्याची चैन जोराने ओढून तोडली. या प्रकारात महिलेस किरकोळ दुखापतही झाली. त्यानंतर आरोपी घराच्या उत्तरेकडील रस्त्यावर मोटारसायकलसह तयार उभ्या असलेल्या आपल्या साथीदाराकडे धावत गेला आणि दोघेही क्षणार्धात घटनास्थळावरून पसार झाले.
भरदिवसा गर्दीच्या वस्तीत घडलेल्या या प्रकारामुळे शिर्डीतील नागरिकांमध्ये संताप व्यक्त केला जात आहे. शहरात वाढत्या चोऱ्या, स्नॅचिंग आणि गुन्हेगारी घटनांमुळे पोलिसांच्या गस्त व्यवस्थेवरही प्रश्नचिन्ह उपस्थित केले जात आहे.
घटनेची माहिती मिळताच शिर्डी पोलिसांनी घटनास्थळी धाव घेत पंचनामा केला असून परिसरातील सीसीटीव्ही फुटेजच्या आधारे आरोपींचा शोध सुरू आहे. पुढील तपास पोलीस उपनिरीक्षक जाधव करीत आहेत.
