नाशिक | प्रतिनिधी
सिन्नर तालुक्यातील मिरगाव येथील ईशानेश्वर देवस्थानाच्या नावावर झालेल्या निधी वाटप प्रकरणाने आता गंभीर वादाचे रूप धारण केले आहे. भोंदूबाबा व विकृत गुन्हेगार म्हणून ओळखल्या जाणाऱ्या अशोक खरात ऊर्फ कॅप्टन याच्याशी संबंधित असलेल्या या देवस्थानाला प्रादेशिक पर्यटन विकास योजनेंतर्गत तब्बल १ कोटी ५ लाख रुपयांचा निधी मंजूर करण्यात आला. मात्र, हा निधी कोणत्या प्रस्तावाच्या आधारे मंजूर झाला, याबाबत प्रशासनाकडे कोणतीही ठोस माहिती उपलब्ध नसल्याने संशय अधिकच गडद झाला आहे.
विशेष म्हणजे, ईशानेश्वर देवस्थानाचा पर्यटनस्थळांच्या अधिकृत यादीत समावेशच नाही. तरीही एवढ्या मोठ्या रकमेचा निधी कसा मंजूर झाला, हा प्रश्न आता उपस्थित होत आहे. या प्रकरणात प्रस्ताव तयारच झाला नव्हता का, की मुद्दाम गायब करण्यात आला, यावरही संशय व्यक्त केला जात आहे.
नियमाप्रमाणे, प्रादेशिक पर्यटन विकास निधीसाठी सार्वजनिक बांधकाम विभागाकडून प्रस्ताव जिल्हा नियोजन अधिकाऱ्यांकडे पाठवला जातो. त्यानंतर जिल्हाधिकाऱ्यांच्या माध्यमातून तो पर्यटन मंत्रालयाकडे पाठवला जातो आणि मंजुरीनंतर निधी वितरित केला जातो. मात्र, या संपूर्ण प्रक्रियेत ईशानेश्वर देवस्थानाच्या बाबतीत कोणतीही कागदपत्रे उपलब्ध नसल्याने मोठा गैरव्यवहार झाल्याची शक्यता वर्तवली जात आहे.
सदर निधी शासन निर्णय क्रमांक २०१८/३/प्र.क्र. १९१ पर्यटन दि. ३१ मार्च २०१८ अन्वये मंजूर करण्यात आला असल्याचे सांगितले जात असले, तरी त्या अनुषंगाने प्रस्ताव कोणी दिला, कोणाची शिफारस होती, याबाबत प्रशासनाकडे ठोस उत्तर नाही.
यामुळे आता हा निधी राजकीय हस्तक्षेपातून मंजूर झाला का, की भोंदूबाबाच्या संबंधातून परस्पर मंजुरी देण्यात आली, असा गंभीर सवाल उपस्थित झाला आहे. या प्रकरणाची सखोल चौकशी करून दोषींवर कठोर कारवाई करण्याची मागणी नागरिकांकडून जोर धरू लागली आहे.
