शिर्डी : शिर्डी शहरात उशिरा रात्री एक धक्कादायक घटना घडली. नमाज पठणासाठी आलेल्या तरुणावर अज्ञात तिघांनी धारदार शस्त्राने जीवघेणा हल्ला केला. या घटनेमुळे शहरात एकच खळबळ उडाली असून तणावाचे वातावरण निर्माण झाले आहे.
जखमी तरुणाचे नाव दानिश नफीस चौधरी (रा. देवबंद) असे असून तो रमजान महिन्यानिमित्त तरावीह नमाज पठणासाठी शिर्डीत आला होता. हल्ल्यात तो गंभीर जखमी झाला असून त्याच्यावर श्री साईबाबा संस्थान ट्रस्ट संचलित रुग्णालयात उपचार सुरू आहेत. त्याची प्रकृती चिंताजनक असल्याची माहिती सूत्रांनी दिली.
⚔️ मोटारसायकलवरून आले, चाकूने वार करत दगडांनी मारहाण
मिळालेल्या माहितीनुसार, दानिश चौधरी हे शहरातील टाकी परिसरात फिरत असताना अचानक मोटारसायकलवरून आलेल्या तिघांनी त्यांच्यावर हल्ला चढवला. आरोपींनी चाकू काढून वार केले. दानिश खाली पडल्यानंतरही हल्लेखोरांनी दगडांनी मारहाण करत त्यांच्या डोक्यावर व पायावर गंभीर दुखापत केली आणि तेथून फरार झाले.
जखमी दानिश यांनी सांगितले की, “मी नमाज पठणासाठी शिर्डीत आलो होतो. टाकी परिसरात गेलो असता अचानक तिघेजण बाइकवर आले आणि माझ्यावर हल्ला केला.”
🚨 घटनेनंतर पोलीस घटनास्थळी; सीसीटीव्ही तपासणी सुरू
घटनेची माहिती मिळताच शिर्डी पोलीस तात्काळ घटनास्थळी दाखल झाले. पंचनामा करण्यात आला असून परिसरातील सीसीटीव्ही फुटेजची तपासणी सुरू आहे. आरोपींचा शोध घेण्यासाठी विशेष पथके रवाना करण्यात आली आहेत.
या प्रकरणाचा तपास रणजीत गलांडे यांच्या मार्गदर्शनाखाली पोलीस उपनिरीक्षक सागर काडे व निवांत जाधव यांच्या पथकाकडून सुरू आहे.
🏛️ पोलीस ठाण्यासमोर जमाव; तात्काळ अटकेची मागणी
घटनेनंतर संतप्त नागरिकांनी शिर्डी पोलीस ठाण्यासमोर जमाव जमवत आरोपींना तात्काळ अटक करून कठोर कारवाई करण्याची मागणी केली. “निर्दोष मुलावर हल्ला करणाऱ्यांना तत्काळ अटक व्हावी आणि अशा घटना पुन्हा घडू नयेत,” अशी मागणी जखमीच्या नातेवाईकांनी केली आहे.
⚖️ कायदा व सुव्यवस्था अबाधित ठेवण्यासाठी पोलिसांनी अतिरिक्त बंदोबस्त तैनात केला आहे. आरोपींची ओळख पटवून त्यांना लवकरात लवकर अटक केली जाईल, असा विश्वास पोलिसांनी व्यक्त केला आहे.
