शिर्डी (साई दर्शन न्यूज) – नवीन वर्षाच्या पहिल्याच दिवशी श्री क्षेत्र शिर्डी येथे साईभक्तांची प्रचंड गर्दी पाहायला मिळत असून, संपूर्ण परिसर भक्तिभावाने फुलून गेला आहे. श्री साईबाबांच्या दर्शनासाठी देश-विदेशातून आलेल्या भाविकांमुळे शिर्डीत उत्साहाचे आणि श्रद्धेचे वातावरण अनुभवायला मिळत आहे.
शिर्डी महोत्सवाच्या निमित्ताने दानशूर साईभक्त श्री. बी. ए. बसवराज (बेंगळूरू) यांच्या उदार देणगीतून श्री साईबाबा मंदिर व संपूर्ण परिसरात अत्यंत आकर्षक, मनोवेधक व सुगंधी फुलांची सजावट करण्यात आली आहे. रंगीबेरंगी फुलांनी साकारलेली सजावट भाविकांचे विशेष लक्ष वेधून घेत आहे.
तसेच दानशूर साईभक्त श्री. निलेश सुरेश नरोडे (मे. ओम साई इलेक्ट्रिकल्स अॅण्ड डेकोरेटर्स, शिंगवे, शिर्डी) यांच्या देणगीतून मंदिर व परिसरात भव्य आणि सुंदर विद्युत रोषणाई करण्यात आली आहे. रोषणाईमुळे रात्रौच्या वेळी संपूर्ण साईमंदिर परिसर अधिकच दिव्य व अलौकिक भासू लागला आहे.
नवीन वर्षाच्या प्रारंभी श्री साईबाबांच्या दर्शनाने भक्तांच्या मनात आनंद, समाधान व सकारात्मकतेची भावना निर्माण झाली असून, शिर्डी नगरी पुन्हा एकदा साईनामाच्या गजराने दुमदुमून गेली आहे.
