शिर्डी (प्रतिनिधी):
शिर्डी व परिसरातील शेकडो ठेवीदारांची कोट्यवधी रुपयांची लूट करणाऱ्या ग्रो मोअर कंपनीच्या फसवणूकप्रकरणात सावळे टोळीला न्यायालयाकडून जोरदार झटका बसला आहे. या प्रकरणातील संशयित आरोपी राजाराम भटू सावळे व सुबोध सुकदेव सावळे यांचे अटकपूर्व जामीन अर्ज उच्च न्यायालयाच्या औरंगाबाद खंडपीठाने ठाम शब्दांत नामंजूर केले आहेत. न्यायमूर्ती एम. के. पठाण यांनी आरोपींना कोणताही दिलासा देण्यास स्पष्ट नकार दिला.
यापूर्वीच राहाता सत्र न्यायालयाने देखील या दोघांचे अटकपूर्व जामीन अर्ज फेटाळून लावले होते. आता उच्च न्यायालयानेही शिक्कामोर्तब केल्याने सावळे टोळीची कायदेशीर पळवाट पूर्णतः बंद झाली आहे.
१५ टक्के परताव्याचे आमिष; ठेवीदारांची निर्दय फसवणूक
मुख्य सूत्रधार भूपेंद्र राजाराम सावळे (वय २७) व त्याच्या साथीदारांनी दरमहा १० ते १५ टक्के परतावा देण्याचे भुरळ पाडणारे आमिष दाखवून नागरिकांकडून मोठ्या प्रमाणावर गुंतवणूक उकळली. सुरुवातीला काहींना थातूरमातूर रक्कम देऊन विश्वास संपादन केला; मात्र नंतर ना परतावा, ना मूळ रक्कम — अशा प्रकारे ठेवीदारांची निर्घृण फसवणूक करण्यात आली.
राहाता–शिर्डी पोलीस ठाण्यांत गुन्हे; ईओडीत तपास
या आर्थिक घोटाळ्याप्रकरणी प्रथम राहाता पोलीस ठाण्यात गुन्हा दाखल करण्यात आला. फसवणुकीचे धागेदोरे शिर्डीशी जोडले गेल्यानंतर शिर्डी पोलीस ठाण्यात देखील स्वतंत्र गुन्हा नोंदवण्यात आला. दोन्ही गुन्ह्यांचा तपास आता आर्थिक गुन्हे शाखेकडे (EOW) वर्ग करण्यात आला आहे.
मुख्य आरोपी अटकेत; घोटाळ्याची व्याप्ती वाढण्याची शक्यता
तपासादरम्यान भूपेंद्र सावळे व संदीप सावळे यांना अटक करण्यात आली असून, या प्रकरणाचा सखोल तपास सहायक पोलीस निरीक्षक युवराज आठरे करीत आहेत. तपासात हा घोटाळा कोट्यवधींच्या घरात जात असल्याचे संकेत मिळाले असून, आणखी आरोपी व बोगस गुंतवणूक व्यवहार उघडकीस येण्याची दाट शक्यता आहे.
न्यायालयाचा कडक संदेश
अटकपूर्व जामीन फेटाळून न्यायालयाने आर्थिक फसवणूक करणाऱ्यांना कठोर इशारा दिला असून, ठेवीदारांची फसवणूक सहन केली जाणार नाही, असा स्पष्ट संदेश दिला आहे. या निर्णयामुळे फसवणूकग्रस्त नागरिकांमध्ये समाधान व्यक्त होत असून आरोपींमध्ये खळबळ उडाली आहे.
