शिर्डी, दि. २८ (प्रतिनिधी) – शिर्डी येथील श्री साईबाबा संस्थानच्या श्री साईबाबा सुपर हॉस्पिटलमध्ये दुर्बीणद्वारे बिन टाक्याची इंडॉस्कोपी स्पाइन सर्जरी यशस्वीरित्या संपन्न झाली. ही शस्त्रक्रिया न्यूरो सर्जन डॉ. प्रसाद उंबरकर व भूलतज्ञ डॉ. संतोष सुरवसे यांच्या टीमने केली.
रुग्णाची परिस्थिती व उपचाराची गरज
दुर्गादास राठोड (रा. शिर्डी) जिममध्ये व्यायाम करत असताना भारी वजन उचलण्याचा प्रयत्न केला. त्यावेळी त्यांच्या पाठीच्या मणक्याची गादी सरकली आणि तीव्र वेदना सुरू झाल्या. वेदनेमुळे त्यांचा डावा पाय पूर्ण तोडून टाकावा असे वाटत होते. अशा असह्य वेदना सहन करताना त्यांनी साईबाबा सुपर हॉस्पिटलमध्ये न्यूरो सर्जन डॉ. प्रसाद उंबरकर यांची भेट घेतली.
दुर्बीणद्वारे बिन टाक्याची शस्त्रक्रिया
रुग्णाला ऑपरेशनची भीती वाटत असल्याने, डॉक्टरांनी कमीत कमी जखम होईल अशा प्रकारची शस्त्रक्रिया करण्याचे ठरवले. यासाठी हॉस्पिटलमध्ये प्रथमच दुर्बीणद्वारे इंडॉस्कोपी स्पाइन सर्जरी करण्यात आली. यात भूलतज्ञ डॉ. संतोष सुरवसे व जनरल सर्जन डॉ. अजिंक्य पानगव्हाणे यांचे महत्त्वाचे सहकार्य लाभले.शस्त्रक्रियेनंतर रुग्ण भुतेतून बाहेर येताच चालायला लागले आणि असह्य वेदनेतून सुटका झाली. रुग्णाने आनंद व्यक्त करत डॉक्टर व हॉस्पिटलच्या न्यूरो ओटी टीमचे मनःपूर्वक आभार मानले.
सर्जरी महात्मा ज्योतिराव फुले जन आरोग्य योजनेअंतर्गत मोफत
ही यशस्वी शस्त्रक्रिया महात्मा ज्योतिराव फुले जन आरोग्य योजनेअंतर्गत मोफत करण्यात आली. या यशस्वी शस्त्रक्रियेबद्दल न्यूरो ओटी टीमचे श्री साईबाबा संस्थानचे:
मुख्य कार्यकारी अधिकारी गोरक्ष गाडीलकर भा. प्र. से उपमुख्य कार्यकारी अधिकारी भीमराज दराडे उप वैद्यकीय संचालक डॉ. प्रीतम वडगावे आदींनी अभिनंदन केले.
