मुख्यमंत्री माझी लाडकी बहीण योजनेच्या कार्यक्रमासाठी माणगाव तालुक्यातील मोर्बा येथे कार्यक्रमासाठी महिलांना घेऊन जाणाऱ्या बसचा अपघात झाला. मांजरोणे घाटात बसला अपघात झाला असून या अपघातात नऊ महिला जखमी झाल्या आहेत. जखमी महिलांना गोरेगाव येथील प्राथमिक आरोग्य केंद्रात उपचारासाठी दाखल करण्यात आले आहे.
रायगड जिल्ह्यातील माणगाव तालुक्यात मुख्यमंत्री माझी लाडकी बहीण योजना वचनपूर्ती सोहळ्याच्या तिसऱ्या टप्प्याचा शुभारंभ होणार आहे. या कार्यक्रमाला जाणाऱ्या महिलांच्या बसचा भीषण अपघात झाल्याचे समोर आले आहे. महिलांना घेऊन जाणारी ही एसटी बस चाळीस फूट खोल दरीत कोसळली आहे. सुदैवाने यात कोणतीही जीवीतहानी झाली नाही.
मिळालेल्या माहितीनुसार, श्रीवर्धन तालुक्यातील काही महिलांना घेऊन येत असताना या बसचा मांजरोने घाटात अपघात झाला. म्हसळा येथून माणगावकडे जाताना बस बाजूच्या दरीत घसरल्याने हा अपघात झाला. या अपघातात काही महिला जखमी झाल्या आहेत.
जखमी झालेल्या महिलांवर तातडीने रुग्णालयात दाखल करत उपचार सुरू करण्यात येत आहेत. दरम्यान, एसटी बस चालक नवीन असल्याने मुख्य वळणावरील अंदाज चुकल्याने हा अपघात झाला असल्याचे समजते.
