शिंदे याचा सोमवारी संध्याकाळी पोलिसांसोबत झालेल्या चकमकीत मृत्यू झाला. अक्षय शिंदेवर गोळी झाडणारे पोलीस अधिकारी संजय शिंदे यांच्या जबाबानंतर मुंब्रा पोलिसांनी एफआयआर दाखल केला आहे. कुणालाही सोडणार नाही, अशी धमकी अक्षयने दिल्याचा दावा संजय शिंदे यांनी केला आहे.
अक्षय शिंदे आणि पोलीस अधिकारी हे व्हॅनमध्ये समोरासमोर बसले होते. मध्येच अक्षयने वाद घालायला सुरुवात केली. तो शिवी द्यायला लागला, आता मी काय केलं? मला कुठे घेऊन जाताय? असे प्रश्न विचारायला लागला. पोलिसांनी गाडी थांबवली, परत मागे गेले, आरोपीला समजवण्याचा प्रयत्न करत होते.
त्याच वेळी अक्षयला राग आला, तो बाजूला बसलेले एपीआय मोरे यांच्या कमरेला असेलली पिस्तुल हिसकवण्याचा प्रयत्न करत होता, असा दावा संजय शिंदे यांनी जबाबात केला आहे.शर्मिला ठाकरे यांनी अक्षय शिंदेचं एन्काऊंटर करणाऱ्या पोलिसांना ५१ हजार रुपयांचं बक्षीस जाहीर केलं आहे.
पैसे महत्त्वाचे नाहीत पण याचं उत्तर असंच दिलं पाहिजे, असं मनसे नेते अविनाश जाधव यांनी सांगितलं. तसेच, जे झालं ते योग्य झालं. मी याआधीच म्हटलं होतं. आमचं सरकार असतं तर थेट एन्काऊंटर केलं असतं. त्यामुळे झालेल्या घटनेचं आम्ही समर्थन करतो, असंही अविनाश जाधव म्हणाले.
