शिर्डी | प्रतिनिधी
भारतीय जनसंघाचे संस्थापक पंडित दीनदयाळ उपाध्याय यांच्या जयंतीनिमित्त शिर्डी नगरपरिषदेत त्यांच्या प्रतिमेस पुष्पहार अर्पण करून विनम्र अभिवादन करण्यात आले. यावेळी भारतीय जनता युवा मोर्चा शिर्डी शहराचे पदाधिकारी व कार्यकर्ते उपस्थित होते.
पंडित दीनदयाळ उपाध्याय यांनी मांडलेल्या ‘एकात्म मानवदर्शन’ आणि ‘अंत्योदय’ या विचारांचा समाजजीवनावर मोठा प्रभाव राहिला आहे. समाजातील शेवटच्या घटकापर्यंत विकासाची फळे पोहोचली पाहिजेत, हा त्यांच्या विचारांचा केंद्रबिंदू होता. ग्रामविकास आणि सर्वांगीण समाजविकासासाठी त्यांच्या विचारांची नव्या पिढीला सातत्याने ओळख करून देण्याचा संकल्प यावेळी करण्यात आला.
पंडित दीनदयाळ उपाध्याय यांनी ग्रामीण भागातील सामान्य नागरिकांच्या समस्या, त्यांच्या आकांक्षा आणि विकासाच्या गरजा यांचा सखोल विचार केला. आशा, पुरुषार्थ आणि विकासाचा संदेश समाजातील शेवटच्या घटकापर्यंत पोहोचविल्याशिवाय राष्ट्राची खरी प्रगती शक्य नाही, हा त्यांच्या विचारांचा गाभा असल्याचे यावेळी उपस्थितांनी नमूद केले.
पंडित दीनदयाळ उपाध्याय यांच्या जयंतीनिमित्त त्यांच्या राष्ट्रसेवा, समाजचिंतन आणि अंत्योदयाच्या विचारांना अभिवादन करत उपस्थितांनी हे विचार समाजाच्या तळागाळापर्यंत पोहोचविण्याचा निर्धार व्यक्त केला.
यावेळी भारतीय जनता युवा मोर्चा शिर्डी शहराचे पदाधिकारी, कार्यकर्ते व नागरिक उपस्थित होते.
