शिर्डी : कायदा-सुव्यवस्थेच्या प्रश्नांवर कणखर आणि धडाडीची भूमिका घेणारे शिर्डीचे अप्पर पोलीस अधीक्षक सोमनाथ वाकचौरे यांनी आपला वाढदिवस अनाथाश्रमातील बालकांसोबत साजरा करून सामाजिक बांधिलकीचा अनोखा आदर्श निर्माण केला.
वाढदिवसानिमित्त वाकचौरे यांनी अनाथाश्रमातील बालकांना फळे आणि कपड्यांचे वाटप केले. अचानक मिळालेल्या या आनंदामुळे बालकांच्या चेहऱ्यावर हास्य फुलले. वाढदिवसाच्या शुभेच्छा स्वीकारताना बालकांसोबत त्यांनी काही काळ संवाद साधत त्यांचा आनंद द्विगुणित केला.
सामान्यतः वाढदिवस म्हटला की मोठा खर्च, दिखावा आणि जल्लोष केला जातो. मात्र, दबंग अधिकारी म्हणून ओळख असलेल्या वाकचौरे यांनी अनावश्यक खर्चाला फाटा देत तोच आनंद गरजू आणि अनाथ बालकांसोबत वाटून घेण्याचा निर्णय घेतला. त्यांच्या या संवेदनशील उपक्रमातून ‘सेवा हीच खरी समाजभक्ती’ हा संदेश देण्यात आला.
यावेळी अनाथाश्रमातील पालक तसेच उपस्थितांनी उत्साहात वाढदिवस साजरा करून सोमनाथ वाकचौरे यांना शुभेच्छा दिल्या. बालकांच्या चेहऱ्यावरील आनंद पाहून वाकचौरे यांचाही आनंद द्विगुणित झाला.
कायद्याचा भंग करणाऱ्यांसाठी कडक, मात्र गरजूंसाठी मायेचा हात पुढे करणारा अधिकारी, अशी त्यांच्या कार्यशैलीची वेगळी ओळख या उपक्रमातून पुन्हा अधोरेखित झाली. त्यांच्या या सामाजिक उपक्रमाचे शिर्डीसह परिसरात कौतुक होत आहे.
