अहिल्यानगर (प्रतिनिधी):
अहिल्यानगर येथून विश्वासाने पाठवलेला लाखोंचा कापड मालच लंपास झाल्याची धक्कादायक घटना उघडकीस आली असून, स्थानिक गुन्हे शाखेने थेट राजस्थानपर्यंत पाठलाग करत तब्बल 78,82,184 रुपये किमतीचे 470 कापडाचे रोल जप्त करत मोठी कारवाई केली आहे.
🚛 चालक-क्लिनरच निघाले मास्टरमाइंड; 555 पैकी 470 रोल गायब
फिर्यादी अमरिशकुमार ओमप्रकाश गुप्ता (रा. अहमदाबाद, गुजरात) यांच्या कंपनीचा कापडाने भरलेला कंटेनर बेंगलोरला रवाना करण्यात आला होता. मात्र चालक संजय लिलाधर कुमार व क्लिनर लिलु मीना उर्फ नंदलाल मीना यांनी संगनमत करून 555 पैकी तब्बल 470 कापडाचे रोल परस्पर अपहार करून आर्थिक फायदा करून घेतल्याचे समोर आले.
🕵️♂️ 4 दिवस CCTV तपास; नवापूर ते राजस्थान असा थरारक पाठलाग
या प्रकरणी कोतवाली पोलीस ठाण्यात गुन्हा दाखल होताच पोलीस अधीक्षक सोमनाथ घार्गे यांनी स्थानिक गुन्हे शाखेला तातडीने तपासाचे आदेश दिले.
पोनि किरणकुमार कबाडी यांच्या मार्गदर्शनाखालील पथकाने नवापूर (जि. नंदुरबार) येथे धागेदोरे मिळवत सलग चार दिवस CCTV फुटेज तपासत आरोपींचा माग काढला आणि थेट राजस्थानपर्यंत पोहोचले.
📦 राजस्थानमध्ये मुद्देमाल जप्त; 3 आरोपी ताब्यात
गुप्त माहितीच्या आधारे राजस्थानमधील सुजानगढ, चुरू आणि सिकर भागात छापे टाकत पोलिसांनी मोहम्मद युनुस सलाउद्दीन, बाबुलाल जाट आणि मोहम्मद अमिर सज्जाद यांना ताब्यात घेतले. त्यांच्या चौकशीतून मनोहरठाणा (जि. झालावाड) येथे लपवून ठेवलेला सर्व मुद्देमाल हस्तगत करण्यात आला.
⚖️ पुढील तपास सुरू; मुख्य आरोपी फरार
जप्त केलेला मुद्देमाल आणि ताब्यातील आरोपींना कोतवाली पोलीस ठाण्यात हजर करण्यात आले असून पुढील तपास सुरू आहे. दरम्यान, या प्रकरणातील मुख्य आरोपी चालक व क्लिनर अद्याप फरार असून त्यांचा शोध सुरू आहे.
👏 पोलिसांची दमदार कामगिरी
ही संपूर्ण कारवाई पोलीस अधीक्षक सोमनाथ घार्गे यांच्या मार्गदर्शनाखाली स्थानिक गुन्हे शाखेच्या पथकाने यशस्वीपणे पार पाडली असून, त्यांच्या या धडक कारवाईचे सर्वत्र कौतुक होत आहे.
