शिर्डी | प्रतिनिधी
साईबाबांच्या भक्तीला देश-विदेशाच्या सीमा नसल्याचे पुन्हा एकदा अधोरेखित झाले. जर्मनीतील तब्बल ४१ परदेशी साईभक्तांनी शिर्डीत येऊन श्री साईबाबांच्या समाधीचे अत्यंत श्रद्धा आणि भक्तिभावाने दर्शन घेतले. साईचरणी नतमस्तक होत त्यांनी आपल्या आध्यात्मिक प्रवासाची अविस्मरणीय अनुभूती घेतली.
दर्शनानंतर या सर्व साईभक्तांनी श्री साईबाबा समाधी मंदिरातील स्टेजवर सुमधुर साईभजनांचे सादरीकरण केले. त्यांच्या मधुर स्वरांनी आणि साईनामाच्या अखंड गजराने संपूर्ण समाधी मंदिर परिसर भक्तिरसाने भारावून गेला. देश-विदेशातील भाविकांनीही या भक्तिमय वातावरणाचा मनसोक्त आनंद घेत टाळ्यांच्या गजरात या साईसेवेचे कौतुक केले.
यावेळी श्री साईबाबा संस्थानचे मुख्य कार्यकारी अधिकारी गोरक्ष गाडीलकर (भा.प्र.से.) यांनी जर्मनीतील सर्व साईभक्तांचा शाल व स्मृतिचिन्ह देऊन सन्मान केला. त्यांनी परदेशातून येणाऱ्या साईभक्तांमुळे साईबाबांच्या श्रद्धा व सबुरीचा संदेश जगभर पोहोचत असल्याचे सांगत त्यांच्या भक्तिभावाचे कौतुक केले.
शिर्डीत आलेल्या या जर्मन साईभक्तांच्या भक्तिमय सेवेमुळे साईनामाचा जागतिक महिमा पुन्हा एकदा अनुभवायला मिळाला. श्रद्धा, सबुरी आणि मानवतेचा संदेश देणाऱ्या साईबाबांच्या चरणी विविध देशांतील भाविक एकत्र येत असल्याने शिर्डीचे जागतिक आध्यात्मिक केंद्र म्हणून असलेले महत्त्व अधिक अधोरेखित झाले.
