शिर्डी — श्रद्धा आणि सबुरीचा संदेश देणाऱ्या साईंच्या पवित्र भूमीत आज गंभीर घटनांनी डोके वर काढले आहे. एकेकाळी “साईंचा आशीर्वाद म्हणजे शांती” असे मानले जाणारे हे गाव, आता वाद, गैरव्यवहार, बेजबाबदार प्रशासन आणि भ्रष्टाचाराच्या आरोपांनी हादरले आहे. साई संस्थान आणि शिर्डीचे नाव देशभरात मोठ्या आदराने घेतले जाते, पण गेल्या काही काळात जे घडतंय ते या पवित्र स्थळाच्या प्रतिष्ठेलाच धक्का देणारं आहे.
२️⃣ IAS अधिकाऱ्यांचे कारनामे – साईंच्या सेवेत की स्वतःच्या सोयीसाठी?
साई संस्थानमध्ये आजवर आठ IAS अधिकारी येऊन गेले. पण प्रत्येकजण कोणत्या ना कोणत्या कारणामुळे चर्चेत राहिला. कुणी पदाचा गैरवापर केला, कुणी देणगीदारांकडून महागडी भेटवस्तू स्वीकारल्या. काही अधिकाऱ्यांनी तर कुटुंबासह साई मंदिरातच सहली केल्या, नातेवाईकांना आरती पास आणि VIP दर्शनाची सोय दिली. इतकेच नव्हे तर काहींनी नात्यांनी भारलेल्या कर्मचाऱ्यांना वादग्रस्त पदांवर टिकवून ठेवलं.
ही सर्व प्रकरणं “सेवा” या शब्दाचा अपमान करणारी आहेत. साईंच्या मंदिरात जेथे नम्रता, निःस्वार्थपणा आणि प्रामाणिकपणाचं प्रतीक असायला हवं, तिथे अहंकार आणि स्वार्थाचं दर्शन होत आहे.
३️⃣ ४७ कर्मचाऱ्यांवर चोरीचा गुन्हा – प्रशासन झोपेतच का?
उच्च न्यायालयाने नुकतेच तब्बल ४७ कर्मचाऱ्यांवर ७७ लाख रुपयांच्या इलेक्ट्रिक साहित्याच्या चोरीप्रकरणी गुन्हा दाखल करण्याचे आदेश दिले. ही घटना म्हणजे प्रशासनाच्या निष्काळजीपणाचे सर्वोत्तम उदाहरण आहे. जेव्हा संस्थानचे अधिकारी आणि CEO यांनी वेळीच चौकशी व कारवाई केली असती, तेव्हा शिर्डीची प्रतिमा कलंकित झाली नसती.
ग्रामस्थ, पत्रकार, साईभक्त यांनी वेळोवेळी केलेल्या तक्रारी, दिलेल्या सूचना, दाखवलेल्या त्रुटी — याकडे कोणीही गंभीरपणे पाहिले नाही. आणि आज साईंच्या नावावर डाग बसला आहे.
४️⃣ शिर्डीकरांचा आवाज — “साईंच्या सेवेला प्रामाणिकपणा हवा!”
शिर्डीतील सन्माननीय ग्रामस्थ, तरुण कार्यकर्ते, पत्रकार आणि भाविक यांची भावना स्पष्ट आहे — साई संस्थान ही केवळ सरकारी यंत्रणा नाही, ती साईंच्या कृपेचं केंद्र आहे.
इथं आलेले अधिकारी दोन वर्षांसाठी येतात, पण आम्ही शिर्डीकर मात्र शेवटच्या श्वासापर्यंत या भूमीत असतो. त्यामुळे आमचं नातं या संस्थानशी भावनिक आहे. आम्हाला साईंची प्रतिष्ठा आणि या भूमीची अस्मिता प्रिय आहे.
आम्ही चुकीला चूक म्हणतो, कारण आम्हाला सत्य बोलण्याचं धैर्य साईंच्या कृपेने मिळालं आहे. संस्थान प्रशासनाने हे ओळखून काम केलं, तरच साईंचं नाव आणि शिर्डीचा सन्मान जपला जाईल.
🔸 शेवटी…
साईंच्या पवित्र सेवेला राजकारण, भ्रष्टाचार आणि स्वार्थाची किनार लागू नये. प्रत्येक अधिकारी, कर्मचारी, भाविक आणि ग्रामस्थाने साईंच्या चरणी नतमस्तक होऊन एकच प्रण करावा — “मी साईंच्या सेवेत प्रामाणिक राहीन.”
हा प्रण प्रत्येकाने घेतला, तर शिर्डीचं तेज पुन्हा पूर्ववत होईल.
बाकी — बाबांची मर्जी! 🙏
