समृद्धी महामार्गाने पुण्याहून नागपूरकडे जात असताना डोणगावच्या पेट्रोलपंपाजवळ काही वेळ आराम करीत असलेल्या व्यापाऱ्यावर शुक्रवारी पहाटे तीन दरोडेखोरांनी चाकूहल्ला केला.
गळ्यातील चार तोळे सोन्याची चेन आणि आयफोन हिसकावला. यापूर्वीही या महामार्गावर लूटमारीची घटना उघड झाली होती. सातत्याने दरोडेखोरांकडून प्रवाशांना लक्ष्य केले जात असल्याने समृद्धी महामार्गावरून प्रवास करणाऱ्यांमध्ये भीती वाढली आहे.
समृद्धी महामार्गावरून प्रवास करताना अपघाताच्या घटना वाढल्याने विरोधकांनी टीकेची झोड उठविली. कारणांचा शोध घेऊन उपायही योजले गेले. प्रवाशांमध्ये जागरुकता आल्याने काही प्रवासानंतर पेट्रोलपंपांच्या आसऱ्याने प्रवासी थांबतात. मुंबई-नागपूर महामार्गावर दोन्ही बाजूंना हे पेट्रोलपंप असल्याने सोयीचे ठरतात.
पुणे येथील रमेश सुरेशभाई पटेल व दीपेश गंगाराम उकानी हे व्यावसायिक कामानिमित्त नागपूरला ३० मे रोजी रात्री कारने निघाले. पुण्यापासून गाडी चालवित आल्याने दोघेही डोणगावजवळ लोणी गवळीच्या पुलापासून थोड्या अंतरावर असलेल्या भारत पेट्रोलपंपावर पहाटे ३.३० वाजता थांबले. पंपापासून थोडे मागे ट्रॅकच्या रांगेत गाडी लावलेली असताना पहाटे ४ वाजता तीन दरोडेखोर आले.
मोठा दगड मारून गाडीच्या काचा फोडल्या. चाकूने वार करून रमेश यांना जखमी झाले. त्यांच्याकडील सोने आणि महागड्या वस्तू दरोडेखोरांनी पळविल्या. हादलेल्या रमेश यांनी तातडीने वाशीम पोलिसांकडे मदत मागितली. ४.४५च्या सुमारास पोलिस आणि रुग्णवाहिका पोहोचली. रुग्णवाहिकेत उपचार करून त्यांना वाशीमच्या खासगी रुग्णालयात उपचारार्थ नेण्यात आले.
