साईनगरी शिर्डीत आज भक्ती, विकास आणि राष्ट्रशक्तीचा अनोखा संगम पाहायला मिळाला. देशाचे पंतप्रधान Narendra Modi यांनी केलेल्या आवाहनाला प्रतिसाद देत राज्याचे मुख्यमंत्री Devendra Fadnavis यांनी विमान प्रवास टाळून थेट मुंबई ते साईनगर शिर्डी असा Vande Bharat Express मधून प्रवास करत सर्वसामान्यांना पर्यावरणपूरक आणि आधुनिक रेल्वे प्रवासाचा संदेश दिला.
🌸 शिर्डीत भव्य स्वागत; मे फ्लॉवरने झाले अभिनंदन
साईनगर शिर्डी रेल्वे स्थानकावर मुख्यमंत्री फडणवीस यांचे आगमन होताच राज्याचे जलसंपदा मंत्री Radhakrishna Vikhe Patil तसेच माजी आमदार Snehalata Kolhe यांनी दुर्मीळ आणि आकर्षक “मे फ्लॉवर फुटबॉल लिली” पुष्प देत अत्यंत आगळ्यावेगळ्या पद्धतीने स्वागत केले. मुख्यमंत्र्यांच्या दौऱ्यामुळे रेल्वे स्थानक परिसरात मोठा पोलीस बंदोबस्त तैनात करण्यात आला होता.
⚡ “भक्ती आणि शक्तीचा संगम”; संरक्षण प्रकल्पामुळे विकासाला चालना
शिर्डीजवळील सावळी विहीर औद्योगिक वसाहतीत तब्बल २०० एकर जागेवर उभारण्यात आलेल्या अत्याधुनिक दारुगोळा उत्पादन प्रकल्पाच्या उद्घाटनासाठी मुख्यमंत्री आले होते. प्रसारमाध्यमांशी संवाद साधताना त्यांनी सांगितले की, “भक्ती आणि शक्ती हे भारतीय अध्यात्मात एकत्र आहेत. दुर्बल व्यक्ती कधीच शांतता प्रस्थापित करू शकत नाही. आपण शक्तिमान असलो तरच जगाला साईंचा श्रद्धा आणि सबुरीचा संदेश देऊ शकतो.” संरक्षण क्षेत्रातील हा प्रकल्प प्रदेशाच्या औद्योगिक आणि आर्थिक विकासाला मोठी गती देईल, असा विश्वास त्यांनी व्यक्त केला.
🚶♂️ साधेपणाची झलक; इलेक्ट्रिक वाहन टाळून पायीच ताफ्याकडे
रेल्वेतून उतरल्यावर प्लॅटफॉर्म क्रमांक १ बाहेर उभ्या असलेल्या वाहन ताफ्याकडे मुख्यमंत्री फडणवीस हे पायी चालत गेले. त्यांच्यासाठी खास ठेवण्यात आलेल्या इलेक्ट्रिक वाहनाचा वापर त्यांनी जाणीवपूर्वक टाळला. कार्यक्रमांना वेळेत पोहोचण्याबरोबरच साधेपणा आणि कार्यसंस्कृतीची झलक त्यांच्या वागण्यातून दिसून आली.
🛤️ “वंदे भारतचा प्रवास लाभदायी”; मुख्यमंत्र्यांचा अनुभव
मुख्यमंत्री म्हणाले, “माननीय मोदीजींनी देशाला दिलेली ही एक अनुपम भेट आहे. जगातील विकसित राष्ट्रांमध्ये जशा आधुनिक ट्रेन असतात, तशाच प्रकारची ही वंदे भारत ट्रेन आहे. आज मी मुंबईहून साईनगर शिर्डीला याच ट्रेनने आलो. अतिशय उत्तम अनुभव होता. प्रवासादरम्यान फाईलचे काम देखील करता आले. त्यामुळे हा प्रवास अत्यंत लाभदायी वाटला.”
