राहाता | प्रतिनिधी
राहाता पोलीस स्टेशनचे नूतन पोलीस निरीक्षक दिपक सरोदे यांनी अवैध व्यवसायांविरोधात धडाकेबाज मोहीम सुरू करत साकुरी येथील हॉटेल आठवण परिसरातील कथित क्लबवर छापा टाकून रम्मी जुगार खेळणाऱ्या तिघांना रंगेहात ताब्यात घेतले. या कारवाईत ४१ हजार ९५० रुपयांचा मुद्देमाल जप्त करण्यात आला असला तरी आता नागरिकांमध्ये एकच चर्चा रंगली आहे — “या क्लबच्या मागे नेमकं कोण आहे?”
कारवाईत दत्तात्रय भोंगळ, किशोर भंगणे आणि संजय राऊत यांच्यावर महाराष्ट्र जुगार प्रतिबंधक कायद्यान्वये गुन्हा दाखल करण्यात आला. मात्र स्थानिकांमध्ये असा आरोप केला जात आहे की, ज्या कथित राजकीय व्यक्तीच्या आशीर्वादाने हे क्लब अनेक दिवसांपासून सुरू होते, त्या ‘मुख्य चेहऱ्यावर’ मात्र अद्याप कोणतीही कारवाई झालेली नाही.
“सामान्यांवर तात्काळ गुन्हे दाखल होतात… मग क्लब चालवणाऱ्यांवर कारवाई का नाही?”, “छापे पडतात पण मुख्य मालक कायम बचावतो कसा?”, “कोणाचा राजकीय वरदहस्त या अवैध धंद्यांना संरक्षण देतोय?” असे संतप्त सवाल आता उघडपणे विचारले जाऊ लागले आहेत.
राहाता शहर आणि परिसरात अनेक दिवसांपासून जुगार, मटका, गुटखा तस्करी आणि कथित क्लब संस्कृती वाढल्याच्या तक्रारी सातत्याने होत होत्या. मात्र नव्याने पदभार स्वीकारलेल्या पोलीस निरीक्षक दिपक सरोदे यांनी धडक कारवाया सुरू केल्यानंतर अवैध धंदेवाल्यांमध्ये मोठी खळबळ उडाली आहे.
दरम्यान, नागरिकांनी आता थेट नूतन पोलीस अधीक्षकांकडे अपेक्षा व्यक्त करत “फक्त किरकोळ कारवाया नकोत… तर या अवैध व्यवसायांच्या मुळावर घाव घालावा,” अशी मागणी केली आहे. “राहाता शहरात राजकीय आशीर्वादावर चालणारे अवैध व्यवसाय कायमस्वरूपी बंद झाले पाहिजेत,” अशी तीव्र भावना नागरिकांमधून व्यक्त होत आहे.
सूत्रांच्या माहितीनुसार, पोलिसांची नजर आता आणखी काही कथित क्लब आणि अवैध अड्ड्यांवर असून आगामी काळात मोठ्या कारवायांची शक्यता व्यक्त केली जात आहे. त्यामुळे अनेक अवैध धंदेवाल्यांचे धाबे दणाणले आहेत.
