राहाता | प्रतिनिधी
खाकी वर्दी म्हणजे केवळ कायदा नव्हे, तर त्यामागे संवेदनशील माणूसही असतो, याचा प्रत्यय राहाता पोलिसांनी पुन्हा एकदा आपल्या कृतीतून दिला आहे. रस्ता चुकल्याने तणावात आलेल्या व अचानक फिट आलेल्या ट्रकचालकावर तत्परतेने उपचार करत पोलिसांनी माणुसकीचे दर्शन घडवले.
दोन दिवसांपूर्वी सोलापूरहून एक ट्रक व त्यातील दोन चालक राहाता बाजार समितीमध्ये कांदा भरण्यासाठी निघाले होते. मात्र, गुगल मॅपच्या आधारे मार्ग शोधताना ट्रक चुकून पंचायत समिती व पोलीस ठाण्याकडे जाणाऱ्या रस्त्यावर वळला. पंचायत समितीची कमान आणि समोरच पोलीस ठाणे दिसताच चालक तणावात गेला आणि त्याला अचानक फिट आली.
ही परिस्थिती पाहून ट्रकच्या क्लीनरने घाबरून मदतीसाठी आरडाओरडा केला. आवाज ऐकताच राहाता पोलीस ठाण्यातील कर्मचारी शिरसाट व त्यांच्या सहकाऱ्यांनी क्षणाचाही विलंब न करता ट्रकजवळ धाव घेतली. चालकाची गंभीर अवस्था पाहून तेथील महिला पोलिस कर्मचाऱ्यांनी तात्काळ शेजाऱ्यांकडून कांदा आणून प्राथमिक उपचार केले.
दरम्यान, पोलिसांनी तातडीने रुग्णवाहिकेला संपर्क केला. मात्र, रुग्णवाहिका येण्यासाठी किमान एक तास लागेल असे सांगण्यात आले. या वेळेत चालकाला नगर–मनमाड महामार्गावर नेण्यासाठी खाजगी वाहन मिळते का, यासाठीही प्रयत्न सुरू होते. तोपर्यंत कांद्याच्या उपचाराचा सकारात्मक परिणाम झाला आणि चालकाची फिट उतरून तो शुद्धीवर आला.
यानंतर पोलिसांनी चालकाला ट्रकच्या केबिनमधून खाली उतरवून सुरक्षित ठिकाणी बसवले. त्याला चहा-बिस्किटे देत सुमारे अर्धा तास विश्रांती घेऊ दिली. प्रकृती पूर्णपणे स्थिर झाल्यानंतर पोलिसांनी त्याला सावकाश व काळजीपूर्वक प्रवास करण्याचा सल्ला दिला.
या मानवतावादी मदतकार्यात पत्रकार राजूभाई पठाण, मनसेचे जाधव तसेच सामाजिक कार्यकर्ते मिलिंद गांधी यांनीही मोलाचा सहभाग नोंदवला.
कायद्याची अंमलबजावणी करतानाच जीव वाचवण्याची जबाबदारीही आम्ही विसरत नाही, असा मूक संदेश देत राहाता पोलिसांनी खाकी वर्दीतील माणुसकी पुन्हा एकदा अधोरेखित केली आहे.
