विधानसभा निवडणुकीनंतर राज्यात अनेक ठिकाणी शिवसेना उद्धव बाळासाहेब ठाकरे पक्षाला गळती लागली आहे. त्यामध्ये अहिल्यानगरचाही समावेश आहे. येथील अनेक पदाधिकाऱ्यांनी यापूर्वीच शिंदे गटात प्रवेश केला आहे. उऱलेल्यांपैकी बहुतांश पदाधिकारी आता प्रवेश करणार आहेत.
दोन दिवसांपूर्वी नगरमध्ये उद्योग मंत्री उदय सामंत यांच्याशी यासंदर्भात नगरमधील शिंदे सेनेचे शहर प्रमुख सचिन जाधव यांनी चर्चा केली. त्यामध्ये ३० तारखेला प्रवेश करण्याचे ठरले. ठाकरे सेनेचे शहरप्रमुख संभाजी कदम यांच्यासह माजी नगरसेवक बाळासाहेब बोराटे, संजय शेंडगे, श्याम नळकांडे, सचिन शिंदे, संतोष गेनाप्पा, परेश लोखंडे, संग्राम कोतकर, बबलू शिंदे यांचा शिंदे सेनेत प्रवेश होणार असल्याचे समजल्यावर दानवे यांनी सोमवारी नगरला आले.
त्यांनी या पदाधिकाऱ्यांशी चर्चा केली. मात्र, विधानसभा निवडणुकीत शिवसेनेची हक्काची जागा राष्ट्रवादीला सोडल्याचा राग कार्यकर्त्यांना आहे, त्यामुळे पक्ष सोडण्यावर ते ठाम राहिले. नगर तालुक्यातील माजी जिल्हा परिषद सदस्य संदेश कार्ले, नगर तालुका पंचायत समितीचे माजी सभापती रामदास भोर हेही शिंदे गटात प्रवेश करणार आहेत.अर्थातच यामागे येणाऱ्या स्थानिक स्वराज्या संस्थांच्या निवडणुकीचे गणित आहे.
विधानसभा निवडणुकीच्यावेळी ही जागा पूर्वीप्रमाणे शिवसेनेकडे घ्यावी, अशी पदाधिकाऱ्यांची मागणी होती. त्यासाठी त्यांनी खूप प्रयत्न केले. मात्र, वरिष्ठांनी ऐकले नाही. त्याचा रागही या पदाधिकाऱ्यांच्या डोक्यात आहे. तेव्हा तुम्ही आमचे ऐकले नाही, आता तुमचे का ऐकावे, असे हे पदाधिकारी मध्यस्थी करण्यासाठी येणाऱ्यांना सांगत आहेत.
