शिर्डी :
आखाती भागात निर्माण झालेल्या युद्धजन्य परिस्थितीचा परिणाम आता देशातील इंधन व गॅस पुरवठा व्यवस्थेवरही दिसून येऊ लागला आहे. आंतरराष्ट्रीय पातळीवर कच्चे तेल व एलपीजी पुरवठ्यावर निर्माण झालेल्या अनिश्चिततेमुळे गॅस कंपन्यांनी घरगुती तसेच व्यावसायिक गॅस सिलेंडर वितरणाबाबत काही कडक निर्बंध लागू केले आहेत. त्यामुळे अनेक ठिकाणी ग्राहकांना गॅस सिलेंडर मिळण्यात अडचणी निर्माण होऊ लागल्या असून शिर्डी परिसरातील ग्राहकांमध्ये देखील चिंता व्यक्त केली जात आहे.
मिळालेल्या माहितीनुसार, यापूर्वी घरगुती गॅस ग्राहकांना २१ दिवसांनी सिलेंडर बुकिंग करण्याची परवानगी होती.
मात्र नव्या नियमांनुसार ही मुदत ३१ दिवसांपर्यंत वाढविण्यात आली आहे. त्यामुळे अचानक गॅस संपल्यास ग्राहकांना काही दिवस प्रतीक्षा करावी लागण्याची शक्यता निर्माण झाली आहे. अनेक ग्राहकांनी सिलेंडर उपलब्ध होत नसल्याची तक्रार देखील गॅस एजन्सीकडे केली आहे.
यासोबतच गॅस कंपन्यांनी डिजिटल पडताळणीची प्रक्रिया देखील कडक केली आहे. ग्राहकांनी गॅस सिलेंडर बुकिंग करताना आपल्या नोंदणीकृत मोबाईल नंबरवरूनच बुकिंग करणे बंधनकारक करण्यात आले आहे. बुकिंग केल्यानंतर ग्राहकांच्या मोबाईलवर OTP (वन टाइम पासवर्ड) पाठवला जात असून तो देणे आवश्यक करण्यात आले आहे. या प्रक्रियेविना सिलेंडर वितरण होणार नसल्याचे सांगण्यात आले आहे.
दरम्यान, गॅस कंपन्यांनी प्रत्येक ग्राहकासाठी वर्षभरात मिळणाऱ्या सिलेंडरचा निश्चित कोटा ठरवलेला आहे. ज्या ग्राहकांचा हा कोटा पूर्ण झाला आहे, त्यांना सध्या चालू मार्च महिन्यात सिलेंडर मिळण्यात अडचणी निर्माण झाल्या आहेत. अशा ग्राहकांना नवीन आर्थिक वर्ष सुरू झाल्यानंतरच म्हणजे एप्रिलपासून सिलेंडर उपलब्ध होणार असल्याचे समजते.
याशिवाय तेल कंपन्यांनी सध्या नवीन अतिरिक्त गॅस सिलेंडरचे वितरण देखील थांबवले असल्याची माहिती सूत्रांकडून मिळाली आहे. यापूर्वी अनेक ग्राहकांकडे दोन किंवा तीन सिलेंडरची सुविधा उपलब्ध करून देण्यात येत होती. मात्र सध्याच्या परिस्थितीत पुरवठ्यावर नियंत्रण ठेवण्यासाठी ही सुविधा तात्पुरती बंद करण्यात आली आहे.
व्यावसायिक गॅस ग्राहकांनाही या निर्णयाचा मोठा फटका बसण्याची शक्यता आहे. हॉटेल, खानावळ, केटरिंग व्यवसाय तसेच लहान उद्योगांना गॅस सिलेंडर दरामध्ये काही प्रमाणात सवलत तसेच क्रेडिट सुविधेवर सिलेंडर उपलब्ध करून दिले जात होते. मात्र नव्या नियमावलीनुसार ही सवलत व क्रेडिट सुविधा बंद करण्यात आल्याची माहिती समोर आली आहे. तसेच गॅस एजन्सींना देखील कंपनीकडून मिळणारी क्रेडिट सुविधा थांबविण्यात आली आहे.
यामुळे गॅस पुरवठा साखळीवर काही प्रमाणात ताण निर्माण होण्याची शक्यता व्यक्त केली जात आहे. दरम्यान, परिस्थिती लक्षात घेता ग्राहकांनी संयम बाळगावा आणि गॅसचा वापर गरजेपुरता करावा, असे आवाहन गॅस वितरकांकडून करण्यात आले आहे.
चौकट : गॅस ग्राहकांनी सहकार्य करावे
घरगुती गॅस ग्राहकांनी मोबाईलद्वारे अधिकृत पद्धतीने बुकिंग करून आवश्यकतेनुसार अतिरिक्त सिलेंडर भरून ठेवावे. तसेच गॅससाठी बायोमेट्रिक E-KYC प्रक्रिया पूर्ण करणे बंधनकारक करण्यात आले आहे.
सध्याच्या संभाव्य तुटवड्याच्या काळात ग्राहकांनी गॅसचा वापर बचतीने करावा व गॅस कंपन्यांना सहकार्य करावे, असे आवाहन करण्यात आले आहे.
— बबनराव भुसारी पाटील
संचालक, साई गणेश गॅस एजन्सी, शिर्डी
