शिर्डी | प्रतिनिधी
शिर्डीचे भूमिपुत्र, गोरगरिबांचे खरे कैवारी म्हणून ओळखले जाणारे डॉक्टर प्रशांत गोंदकर यांचा वाढदिवस अत्यंत साधेपणा व सामाजिक बांधिलकीच्या वातावरणात साजरा करण्यात आला. या निमित्ताने शिर्डी नगर परिषदेचे नूतन नगरसेवक नंदूभाऊ (सतीश उर्फ नंदू) गोंदकर मित्र मंडळाच्या वतीने डॉक्टर संतोष गोंदकर यांचा शाल व श्रीफल देऊन सन्मान करण्यात आला.
डॉक्टर प्रशांत गोंदकर हे गेल्या अनेक वर्षांपासून शिर्डी व परिसरातील सर्वसामान्य, गोरगरीब, कष्टकरी नागरिकांसाठी वैद्यकीय सेवा देत असून मानवतेच्या भावनेतून उपचार करणारे डॉक्टर म्हणून त्यांची ख्याती आहे. आर्थिक परिस्थिती कमकुवत असलेल्या रुग्णांना माफक दरात किंवा विनामूल्य उपचार देत त्यांनी समाजात एक वेगळाच आदर्श निर्माण केला आहे.
या सन्मानप्रसंगी नगरसेवक नंदूभाऊ गोंदकर यांनी आपल्या मनोगतात सांगितले की,
“डॉक्टर प्रशांत गोंदकर हे केवळ वैद्यकीय सेवा देणारे डॉक्टर नसून ते समाजाचे खरे सेवक आहेत. गोरगरिबांसाठी त्यांनी केलेले कार्य प्रेरणादायी आहे. अशा व्यक्तीचा सन्मान होणे ही शिर्डीकरांसाठी अभिमानाची बाब आहे.”
कार्यक्रमास समाजसेवक नितीन तात्या गोंदकर, रमेश गोंदकर साई तनपुरे संतोष शेजवळ दिनेश गुजर सदाभाऊ शेळके ओम प्रकाश श्रीवास्तव रवि चौधरी सुनील गोंदकर माजी नगरसेवक अशोक गायके यांच्यासह शिर्डी परिसरातील अनेक मान्यवर, कार्यकर्ते, मित्र मंडळाचे पदाधिकारी व नागरिक मोठ्या संख्येने उपस्थित होते. उपस्थितांनी डॉक्टर संतोष गोंदकर यांना वाढदिवसाच्या शुभेच्छा देत त्यांच्या पुढील सामाजिक व वैद्यकीय कार्यासाठी शुभेच्छा दिल्या.
डॉक्टर प्रशांत गोंदकर यांनी उपस्थितांचे आभार मानताना सांगितले की,
“शिर्डी ही माझी जन्मभूमी आहे. येथील लोकांचे ऋण मी कधीही विसरणार नाही. गोरगरिबांची सेवा करणे हाच माझा खरा वाढदिवसाचा आनंद आहे.”
हा वाढदिवस कार्यक्रम दिमाखदार उत्सवाऐवजी सामाजिक ऋणाची जाणीव करून देणारा ठरला. शिर्डीच्या सामाजिक जीवनात योगदान देणाऱ्या अशा व्यक्तींचा सन्मान होणे ही नक्कीच प्रेरणादायी बाब असल्याची भावना उपस्थित नागरिकांनी व्यक्त केली.
