शिर्डी : हॉटेलमधील कौटुंबिक वादाला हिंसक वळण मिळाल्याची घटना शिर्डीत समोर आली आहे. हॉटेल पाम पॅलेसचे भागीदार अक्षय मुकेश लोकचंदानी यांना त्यांच्या मेव्हण्याने शिवीगाळ करत मारहाण केल्याचा तसेच लोखंडी वस्तूने पाठीत, नाकावर व पायावर मारल्याचा गंभीर आरोप करण्यात आला आहे. या प्रकरणी शिर्डी पोलीस ठाण्यात मेव्हणा संतोष लखमीचंद नागवाणी व सासरे लखमीचंद नागवाणी यांच्याविरुद्ध फिर्याद दाखल करण्यात आली आहे.
पोलिसांत दिलेल्या फिर्यादीनुसार, अक्षय लोकचंदानी यांचा विवाह २०१८ मध्ये योगीता यांच्यासोबत झाला आहे. कौटुंबिक वादाच्या पार्श्वभूमीवर पत्नी मागील काही वर्षांपासून माहेरी राहत असल्याचे फिर्यादीत नमूद करण्यात आले आहे. पत्नीला पुन्हा नांदण्यासाठी आणण्याचे प्रयत्न करूनही ती येत नसल्याने दोघांमध्ये न्यायालयीन प्रकरण सुरू असल्याचेही फिर्यादीत म्हटले आहे.
मध्यरात्री हॉटेलबाहेर शिवीगाळ अन् धिंगाणा
दि. १ सप्टेंबर रोजी रात्री सुमारे १२.०५ वाजता अक्षय लोकचंदानी हे हॉटेल पाम पॅलेस येथे रूमची पाहणी करण्यासाठी गेले होते. त्यानंतर रात्री सुमारे १.०५ वाजता संतोष नागवाणी हा ज्युपिटर मोपेडवरून हॉटेलवर आला आणि बाहेरून अक्षय लोकचंदानी यांना शिवीगाळ करत असल्याचा आरोप आहे.
अक्षय यांनी त्याला समजावून सांगण्याचा प्रयत्न केला. मात्र, संतोष हा वाहनावरून खाली उतरून हॉटेलसमोर आला आणि पुन्हा शिवीगाळ करू लागल्याचे फिर्यादीत म्हटले आहे.
मालकाला शिवीगाळ करू नका म्हणताच कर्मचाऱ्यालाही मारहाण
यावेळी हॉटेल कर्मचारी सूरज प्रल्हाद फड यांनी ‘मालकाला शिवीगाळ करू नका’ असे सांगितले. याचा राग आल्याने संतोष नागवाणी याने सूरजच्या तोंडावर हाताने मारहाण केल्याचा आरोप करण्यात आला आहे.
अक्षय लोकचंदानी हे संतोषला समजावून सांगत असताना त्याने त्यांनाही मारहाण केली. एवढ्यावरच न थांबता खिशातील काहीतरी लोखंडी वस्तू काढून अक्षय यांच्या पाठीत, नाकावर आणि पायावर मारल्याने दुखापत झाली, असा गंभीर आरोप फिर्यादीत करण्यात आला आहे. मारहाणीदरम्यान तोंडावर मार लागल्याने दातालाही दुखापत झाल्याचे अक्षय यांनी पोलिसांना सांगितले.
हॉटेल मालकाला बोलावले अन् प्रकरण पोलिसांत
घटनेनंतर अक्षय यांनी संतोष ज्या ठिकाणी काम करतो त्या ठिकाणचे मालक हरीष कालडा यांना फोन करून बोलावून घेतले. त्यानंतर ते संतोषला घेऊन निघून गेल्याचे फिर्यादीत नमूद आहे.
दरम्यान, अक्षय लोकचंदानी शिर्डी पोलीस ठाण्यात गेल्यानंतर पोलिसांनी त्यांना उपचारासाठी दवाखाना मेमो दिला. त्यांनी राहाता ग्रामीण रुग्णालयात उपचार घेतले. त्यानंतर प्रकृतीत सुधारणा झाल्यावर त्यांनी पोलिसांत फिर्याद दाखल केली.
पोलिसांत तक्रार देण्यासाठी जात असतानाही शिवीगाळ
विशेष म्हणजे, या घटनेनंतर पोलीस ठाण्यात तक्रार देण्यासाठी जात असताना सासरे लखमीचंद नागवाणी यांनीही शिवीगाळ केल्याचा आरोप अक्षय लोकचंदानी यांनी केला आहे.
या प्रकरणी अक्षय लोकचंदानी यांच्या फिर्यादीवरून संतोष लखमीचंद नागवाणी व लखमीचंद नागवाणी यांच्याविरुद्ध शिर्डी पोलीस ठाण्यात गुन्हा दाखल करण्यात आला असून, घटनेचा पुढील तपास पोलीस करीत आहेत.
कौटुंबिक वादातून सुरू झालेला हा प्रकार थेट हॉटेलसमोरच्या मारहाणीपर्यंत पोहोचल्याने शिर्डीत चर्चेला उधाण आले आहे.
