शिर्डी | प्रतिनिधी
शिर्डी श्री साईबाबा संस्थानचे माजी अध्यक्ष तथा ज्येष्ठ उद्योगपती डॉ. सुरेशजी हावरे यांची श्री रामजन्मभूमी तीर्थ क्षेत्र ट्रस्टच्या मुख्य कार्यकारी अधिकारी (CEO) निवड समितीच्या सदस्यपदी नियुक्ती करण्यात आली आहे. ही नियुक्ती धार्मिक, सामाजिक आणि व्यवस्थापन क्षेत्रात त्यांच्या दीर्घ अनुभवाची दखल मानली जात असून शिर्डीसह संपूर्ण महाराष्ट्रासाठी अभिमानाची बाब ठरत आहे.
डॉ. हावरे यांनी शिर्डी साईबाबा संस्थानच्या अध्यक्षपदाच्या कार्यकाळात पारदर्शक प्रशासन, भाविकाभिमुख सुविधा आणि विकासकामांवर भर देत प्रभावी नेतृत्व केले होते. उद्योग, व्यवस्थापन, समाजसेवा आणि सार्वजनिक जीवनातील त्यांचा व्यापक अनुभव लक्षात घेऊन त्यांच्यावर ही महत्त्वाची जबाबदारी सोपविण्यात आली आहे.
रामजन्मभूमी तीर्थ क्षेत्राशी संबंधित विविध प्रशासकीय प्रक्रिया अधिक सक्षम आणि गुणवत्तापूर्ण करण्यासाठी निवड समितीची भूमिका अत्यंत महत्त्वाची मानली जाते. अशा समितीवर डॉ. हावरे यांची निवड झाल्याने त्यांच्या कार्यक्षमतेवर पुन्हा एकदा शिक्कामोर्तब झाल्याची भावना व्यक्त होत आहे.
या नियुक्तीमुळे धार्मिक वारशाचे जतन, सुयोग्य प्रशासन आणि विकासात्मक निर्णयप्रक्रियेला अधिक बळ मिळेल, असा विश्वास विविध क्षेत्रातील मान्यवरांनी व्यक्त केला आहे.
डॉ. सुरेशजी हावरे यांच्या नियुक्तीचे वृत्त समोर येताच सामाजिक, धार्मिक, औद्योगिक तसेच शिर्डी परिसरातील विविध संस्था, पदाधिकारी आणि नागरिकांकडून त्यांच्यावर अभिनंदनाचा वर्षाव होत आहे. त्यांच्या पुढील कार्यासाठी सर्व स्तरांतून शुभेच्छा व्यक्त करण्यात येत आहेत.
