शिर्डी : श्री साईबाबा संस्थानच्या सेवेत कार्यरत असलेल्या स्वच्छता विभागाच्या बाह्यस्त्रोत कंत्राटी महिला कर्मचारी सौ. रेखा रविंद्र अवचिते यांनी आपल्या प्रामाणिकपणाचा आदर्श घालून देत साईनगरीची मान उंचावली आहे.
दि. ३ जून २०२६ रोजी दुपारी साईबाबा हॉस्पिटल बाहेरील पिण्याच्या पाण्याच्या ठिकाणी काम करत असताना त्यांना अंदाजे १ तोळे वजनाचे सोन्याचे मंगळसूत्र व कानातील दागिने सापडले. या दागिन्यांची किंमत सुमारे १ लाख ४० हजार रुपये इतकी होती. एवढ्या मौल्यवान वस्तू सापडूनही कोणताही मोह न बाळगता त्यांनी ते तात्काळ संरक्षण कार्यालयात जमा केले.
दरम्यान, चौकशीदरम्यान हॉस्पिटलमध्ये उपचार घेत असलेल्या सौ. मिराबाई कैलास गांगुर्डे (रा. पिंपळवाडी) यांचे दागिने हरवल्याचे त्यांच्या पुत्र श्री. दत्तात्रय कैलास गांगुर्डे यांनी सांगितले. दागिन्यांची योग्य ओळख व खातरजमा केल्यानंतर ते त्यांच्या स्वाधीन करण्यात आले. हरवलेले दागिने परत मिळाल्याने गांगुर्डे कुटुंबीयांच्या डोळ्यांत आनंदाश्रू तरळले.
सौ. रेखा अवचिते यांनी दाखविलेल्या या प्रामाणिकपणा व कर्तव्यनिष्ठेचे श्री साईबाबा संस्थानचे मुख्य कार्यकारी अधिकारी मा. श्री. गोरक्ष गाडीलकर तसेच उपमुख्य कार्यकारी अधिकारी मा. श्री. भीमराज दराडे यांनी विशेष अभिनंदन केले.
“साईबाबांच्या सेवेत असताना प्रामाणिकपणा हीच खरी पूजा आहे,” याची जिवंत प्रचिती सौ. रेखा अवचिते यांनी आपल्या कृतीतून दिली. आजच्या काळात लाखो रुपयांचे दागिने परत करून त्यांनी केवळ एक कुटुंबाचा आनंद परत मिळवून दिला नाही, तर साईसेवेतील प्रामाणिकतेचा आदर्शही समाजासमोर ठेवला आहे.
