साईबाबांच्या दर्शनासाठी देशभरातून लाखो भाविक शिर्डीत येत असताना, कडक सुरक्षा व्यवस्था आणि सर्वत्र सीसीटीव्ही कॅमेरे असूनही चैन स्नॅचिंगचे प्रकार सुरूच असल्याने भाविकांच्या सुरक्षिततेचा प्रश्न पुन्हा ऐरणीवर आला आहे. आज पहाटे शिर्डीत ५ लाख ६० हजार रुपयांचे सोन्याचे दागिने चोरीला गेल्याची गंभीर घटना घडली.
याप्रकरणी धारवाड (कर्नाटक) येथील नविनकुमार निंगारेड्डी कोनारेड्डी (वय २८, व्यवसाय – सिव्हिल कॉन्ट्रक्टर) यांनी शिर्डी पोलीस ठाण्यात फिर्याद दिली आहे. फिर्यादीनुसार, ते आपल्या आई-वडील व पत्नीसह दि. १४ जानेवारी रोजी शिर्डीत दाखल झाले होते व अलौकीक हॉटेलमध्ये मुक्कामास होते.
दि. १५ जानेवारी रोजी पहाटे सुमारे ५ वाजता साईबाबांच्या दर्शनासाठी निघाल्यानंतर सकाळी ६.४० वाजता दर्शन करून गेट क्रमांक दोनमधून बाहेर पडताना, श्रद्धा सबुरी पॅलेस हॉटेलसमोर पायी जात असताना मोटारसायकलवरून आलेल्या दोन अज्ञात चोरट्यांनी त्यांच्या आई प्रेमा निंगारेड्डी कोनारेड्डी यांच्या गळ्यातील सोन्याचे दागिने ओढून पळ काढला.
चोरट्यांनी
▪️ १२ ग्रॅम वजनाची सोन्याची चैन (₹६०,०००)
▪️ ४० ग्रॅम वजनाची तीन पदरी सोन्याची चैन (₹२,००,०००)
▪️ ६० ग्रॅम वजनाचे मोठे मंगळसूत्र काळ्या मण्यांसह (₹३,००,०००)
असे एकूण ₹५,६०,००० किमतीचे दागिने हिसकावून नेल्याचे फिर्यादीत नमूद आहे.
घटना अत्यंत वर्दळीच्या परिसरात, मंदिराच्या अवघ्या काही अंतरावर घडली असून श्रद्धा सबुरी पॅलेस परिसरात सीसीटीव्ही कॅमेरे, पोलिस बंदोबस्त असतानाही चोरट्यांनी राँग साईडने भरधाव पळ काढल्याने सुरक्षा यंत्रणेवर गंभीर प्रश्न उपस्थित झाले आहेत.
इतकी व्यापक सुरक्षा व्यवस्था, सतत पेट्रोलिंग आणि शेकडो सीसीटीव्ही कॅमेरे असूनही चैन स्नॅचिंगचे प्रकार थांबत नसल्याने हे चोरटे थेट पोलिसांनाच आव्हान देत आहेत का? असा सवाल भाविकांमधून उपस्थित केला जात आहे.
या प्रकरणी शिर्डी पोलीस ठाण्यात अज्ञात दुचाकीस्वार चोरट्यांविरुद्ध गुन्हा दाखल करण्यात आला असून, सीसीटीव्ही फुटेजच्या आधारे चोरट्यांचा शोध सुरू आहे. पुढील तपास शिर्डी पोलीस करीत आहेत.
“चैन स्नॅचिंग प्रकरणी दाखल गुन्ह्याचा तपास प्राधान्याने सुरू असून, सीसीटीव्ही फुटेज व तांत्रिक विश्लेषणाच्या आधारे लवकरच आरोपींना जेरबंद करण्यात येईल. भाविकांच्या सुरक्षिततेसाठी पोलीस सतर्क असून मंदिर परिसरात बंदोबस्त वाढविण्यात आला आहे.”
— अमोल भारती,
पोलीस उपविभागीय अधिकारी
