शिर्डी : साईनगरीत गॅस वितरणाचा अक्षरशः बोजवारा उडाल्याचे धक्कादायक वास्तव समोर आले आहे. शहरातील गणेश गॅस एजन्सीवर काळाबाजार, साठेबाजी आणि ग्राहकांची उघड लूट सुरू असल्याचे गंभीर आरोप होत असून, यामुळे सामान्य नागरिकांमध्ये तीव्र संताप उसळला आहे.
पहाटेपासून महिलांसह ज्येष्ठ नागरिक आणि कष्टकरी वर्ग रांगेत उभा राहतो, मात्र दिवसभर उन्हात ताटकळत राहूनही गॅस मिळत नाही. अनेकांना शेवटी रिकाम्या हाताने घरी परतावे लागते. “घरात चूल पेटवायची कशी?” असा सवाल संतप्त महिलांनी उपस्थित केला आहे.
🔴 मागच्या गेटने ‘ब्लॅक’चा धुमाकूळ
एकीकडे शेकडो ग्राहक रांगेत उभे असताना, दुसरीकडे एजन्सीच्या मागील गेटमधून जादा पैशात सिलेंडर विक्री सुरू असल्याचा आरोप नागरिकांनी केला आहे. पैसे मोजणाऱ्यांना काही मिनिटांत गॅस, तर गरीबांना दिवसभर थांबूनही काहीच नाही—असा उघड दुजाभाव सुरू असल्याचे चित्र आहे.
🔴 कर्मचाऱ्यांचाच काळाबाजारात सहभाग?
एजन्सीतील काही कर्मचाऱ्यांकडे शेकडो गॅस कार्ड असल्याची माहिती समोर आली आहे. या कार्डच्या आधारे मोठ्या प्रमाणात सिलेंडर उचलून ते बाहेर ‘ब्लॅक’मध्ये विकले जात असल्याचा संशय व्यक्त केला जात आहे. म्हणजेच, ज्यांनी सेवा द्यायची तेच लुटीच्या साखळीत सामील असल्याचा आरोप नागरिक करत आहेत.
🔴 KYC, OTPचा खेळ – ग्राहकांची फसवणूक
गॅस धारकांची KYC करून घेतली जाते, मोबाईलवरून बुकिंग घेतले जाते आणि OTPही मागवला जातो; मात्र प्रत्यक्षात सिलेंडर दिलाच जात नाही. यामुळे अनेक ग्राहकांची फसवणूक होत असून, हा प्रकार थेट विश्वासघात असल्याचे बोलले जात आहे.
🔴 हॉटेल व्यावसायिकांना ‘ब्लॅक’ पुरवठा?
शासनाने घरगुती गॅसचा कमर्शियल वापर रोखण्यासाठी नियम कडक केले असतानाही, काही हॉटेल चालकांना ब्लॅकमध्ये सिलेंडर पुरवठा होत असल्याचे समोर आले आहे. त्यामुळे नियम फक्त कागदावरच राहिले आहेत का? असा प्रश्न उपस्थित होत आहे.
🔴 एजन्सीतील ढिसाळ कारभार – मॅनेजरच गायब!
गॅससाठी शेकडो ग्राहक रांगेत उभे असताना एजन्सीचे मॅनेजर आणि कर्मचारी गैरहजर असल्याचे वारंवार दिसून येते. कोणतीही जबाबदारी नाही, नियंत्रण नाही—पूर्णपणे मनमानी कारभार सुरू असल्याचे चित्र आहे.
🔴 महिलांचे हाल – प्रशासन मुके साक्षीदार?
“लाडक्या बहिणींसाठी योजना जाहीर होतात, पण इथे आम्हाला गॅससाठी भिक मागावी लागते,” अशा शब्दांत महिलांनी संताप व्यक्त केला. रोजंदारी करणाऱ्यांना काम सोडून रांगेत उभे राहावे लागते, त्यामुळे आर्थिक फटका बसत आहे.
📢 नागरिकांचा संतप्त इशारा :
जर तात्काळ कारवाई झाली नाही, तर नागरिक रस्त्यावर उतरून तीव्र आंदोलन छेडतील, असा इशारा देण्यात आला आहे.
📌 मागणी काय?
गणेश गॅस एजन्सीची तात्काळ चौकशी
काळाबाजार करणाऱ्यांवर गुन्हे दाखल
संबंधित अधिकाऱ्यांची जबाबदारी निश्चित करणे
पारदर्शक व सुरळीत गॅस वितरण व्यवस्था सुरू करणे
शिर्डीसारख्या जागतिक कीर्तीच्या ठिकाणी असा प्रकार घडत असल्याने प्रशासनाच्या कार्यक्षमतेवर मोठे प्रश्नचिन्ह निर्माण झाले आहे. आता जिल्हाधिकारी आणि पुरवठा विभाग या गंभीर प्रकरणात कधी आणि कितपत कठोर कारवाई करतात, याकडे संपूर्ण शहराचे लक्ष लागले आहे.
