शिर्डी : महाराष्ट्र राज्य विधानपरिषदेचे अध्यक्ष राम शिंदे यांनी आज शिर्डी येथे श्री साईबाबांच्या समाधीचे दर्शन घेऊन साईचरणी नतमस्तक झाले. समाधी मंदिरात त्यांनी साईबाबांच्या चरणी प्रार्थना करत राज्याच्या प्रगतीसह सर्वसामान्य जनतेच्या सुख-समृद्धीसाठी आशीर्वाद मागितला.
दर्शनानंतर श्री साईबाबा संस्थानच्या वतीने मा. उपमुख्य कार्यकारी अधिकारी भिमराज दराडे यांनी श्री शिंदे यांचा श्री साईबाबांची प्रतिमा व शाल देऊन सन्मानपूर्वक सत्कार केला. यावेळी संस्थानच्या अधिकाऱ्यांनी त्यांचे स्वागत करत संस्थानच्या विविध उपक्रमांची माहिती दिली.
शिर्डीत येणाऱ्या लाखो साईभक्तांप्रमाणेच राज्यातील विविध मान्यवरही वेळोवेळी साईबाबांच्या दर्शनासाठी येत असतात. श्री साईबाबांच्या समाधीचे दर्शन घेतल्यानंतर राम शिंदे यांनी समाधी मंदिरातील भक्तिमय वातावरणाचा अनुभव घेत साईचरणी कृतज्ञता व्यक्त केली.
शिर्डीतील त्यांच्या भेटीमुळे मंदिर परिसरात भाविकांमध्ये उत्साहाचे वातावरण निर्माण झाले. श्री साईबाबांच्या कृपेने राज्यात शांतता, समृद्धी आणि जनकल्याण नांदो, अशी प्रार्थना यावेळी करण्यात आली.
