शिर्डी | प्रतिनिधी
साईबाबांच्या दर्शनासाठी कर्नाटक राज्यातून शिर्डीत आलेल्या एका साईभक्त कुटुंबावर काळाने घाला घातला. आदर्श शाळेजवळ रस्ता ओलांडत असताना अवघ्या चार वर्षीय कु. कृतिका मेघवाल हिला ट्रॅव्हल्स बसची जोरदार धडक बसल्याने तिचा दुर्दैवी मृत्यू झाला. या हृदयद्रावक घटनेने संपूर्ण साईनगरीत हळहळ व्यक्त होत आहे.
मिळालेल्या माहितीनुसार, ९ जुलै रोजी मेघवाल कुटुंब साईबाबांच्या दर्शनासाठी शिर्डीत आले होते. आदर्श शाळेजवळ कुटुंबीयांसह रस्ता ओलांडत असताना ४० सीटर साई गौरी ट्रॅव्हल्स बसने चिमुकलीला जोरदार धडक दिली. धडक इतकी भीषण होती की, कृतिका गंभीर जखमी झाली.
घटनेची माहिती मिळताच शिर्डी पोलीस ठाण्याचे पोलीस निरीक्षक रणजित गलांडे, पोलीस कर्मचारी संदीप उंदावत व पोलीस पथक तात्काळ घटनास्थळी दाखल झाले. स्थानिक नागरिकांच्या मदतीने जखमी चिमुकलीला तातडीने साईबाबा संस्थानच्या साईबाबा सुपर स्पेशालिटी हॉस्पिटलमध्ये दाखल करण्यात आले. मात्र, वैद्यकीय अधिकाऱ्यांनी तपासणीअंती तिला मृत घोषित केले.
या घटनेनंतर रुग्णालयात मुलीच्या आई-वडिलांचा आणि नातेवाईकांचा आक्रोश पाहून उपस्थितांचे डोळे पाणावले. साईदर्शनासाठी आनंदाने आलेल्या कुटुंबावर एका क्षणात दु:खाचा डोंगर कोसळल्याने संपूर्ण परिसरात शोककळा पसरली.
दरम्यान, अपघातानंतर पोलिसांनी संबंधित ट्रॅव्हल्स बस ताब्यात घेतली असून रात्री उशिरापर्यंत अपघाताचा गुन्हा दाखल करण्याची प्रक्रिया सुरू होती.
या प्रकरणाचा पुढील तपास पोलीस निरीक्षक रणजित गलांडे यांच्या मार्गदर्शनाखाली सुरू आहे.
या दुर्दैवी घटनेनंतर शिर्डीत येणाऱ्या भाविकांनी विशेषतः लहान मुलांची काळजी घ्यावी, गर्दीच्या ठिकाणी त्यांचा हात सोडू नये आणि रस्ता ओलांडताना अधिक सतर्कता बाळगावी, असे आवाहन करण्यात आले आहे.
