राहता पोलीस ठाण्यात नूतन पोलीस निरीक्षक दीपक सरोदे यांनी पदभार स्वीकारताच नागरिकांच्या अपेक्षा उंचावल्या आहेत. मात्र त्यांच्या समोर आता राहता शहरातील वाढत्या अवैध व्यवसायांचे समूळ उच्चाटन करण्याचे मोठे आव्हान उभे ठाकले आहे. शहरात खुलेआम सुरू असलेले गुटखा तस्करी, पत्त्यांचे क्लब, मटका-जुगार, गांजा विक्री, काळे-पिवळे आणि “बिंगो”सारखे अवैध धंदे गुन्हेगारीला खतपाणी घालत असल्याचा गंभीर आरोप नागरिकांकडून केला जात आहे.
स्थानिकांच्या म्हणण्यानुसार, गुटखा तस्कर म्हणून चर्चेत असलेले बंटी आणि खाबिया यांच्या माध्यमातून शहरात मोठ्या प्रमाणावर गुटखा विक्रीचे जाळे कार्यरत असल्याची चर्चा आहे. एवढेच नव्हे तर काही भागांमध्ये रात्री उशिरापर्यंत पत्त्यांचे अड्डे, मटका आणि जुगार खुलेआम सुरू असल्याचे नागरिक सांगत आहेत. या अवैध धंद्यांतून मिळणाऱ्या पैशातून शहरात गुन्हेगारी वाढत असून अनेक तरुण व्यसनांच्या आहारी जात असल्याची धक्कादायक परिस्थिती निर्माण झाली आहे.
राहत्यात गांजा विक्री आणि अवैध जुगारामुळे चोरी, मारामाऱ्या, दहशत आणि टोळक्यांची मुजोरी वाढल्याचा आरोपही नागरिक करत आहेत. काही भागांत काळे-पिवळे आणि “बिंगो”च्या नावाखाली सुरू असलेल्या अवैध प्रकारांमुळे परिसरातील सामाजिक वातावरण दूषित होत असल्याची भावना व्यक्त होत आहे. “हरामाच्या कमाईतून गुन्हेगारीचे साम्राज्य उभे राहत आहे आणि युवकांचे भविष्य अंधारात ढकलले जात आहे,” अशी संतप्त प्रतिक्रिया आता नागरिक देत आहेत.नागरिकांच्या मते, राहत्यातील हे सर्व अवैध व्यवसाय पूर्णपणे बंद झाले तर शहरातील वाढती गुन्हेगारी आपोआप कमी होऊ शकते.
त्यामुळे नूतन पीआय सरोदे यांनी धडक कारवाई करून गुटखा माफिया, जुगार अड्डे, गांजा विक्रेते आणि अवैध धंदे चालवणाऱ्यांवर कठोर कारवाई करावी, अशी जोरदार मागणी नागरिकांकडून केली जात आहे. आता नूतन पोलीस निरीक्षक सरोदे हे या अवैध साम्राज्यावर कितपत वचक निर्माण करतात, याकडे संपूर्ण राहता तालुक्याचे लक्ष लागले आहे.
