शिर्डी : साईनगरीत रात्रीच्या अंधाराचा फायदा घेत संशयास्पदरीत्या फिरणाऱ्या दोघांवर शिर्डी पोलिसांनी कारवाई केली आहे. नगरपरिषदेच्या पाण्याच्या टाकीजवळ मध्यरात्रीच्या सुमारास दुचाकीवर फिरताना आढळलेल्या दोघांकडे पोलिसांनी चौकशी केली असता त्यांच्या ताब्यातील मोटारसायकलच्या मालकी हक्काबाबत समाधानकारक माहिती अथवा कागदपत्रे सादर करता आली नसल्याचे पोलिसांच्या फिर्यादीत नमूद आहे.
दि. ५ सप्टेंबर रोजी मध्यरात्री डायल ११२च्या पेट्रोलिंगदरम्यान ही कारवाई करण्यात आली. पोलीस पथकाला अंधारात दुचाकीवर दोन इसम संशयास्पदरीत्या फिरताना दिसून आले. पोलिसांनी त्यांना थांबवून चौकशी केली असता त्यांनी तारकेश कुमार गणेश (वय २९, रा. बिहार) व सागर मच्छिंद्र त्रिभुवन (वय २४, रा. कालिकानगर, शिर्डी) अशी नावे सांगितली.
दुचाकीच्या मालकीवर प्रश्नचिन्ह?
पोलिसांनी त्यांच्या ताब्यातील बजाज पल्सर एनएस १६० (एमएच १५ केझेड ५६११) या दुचाकीची कागदपत्रे व मालकी हक्काबाबत विचारणा केली. मात्र, दोघांकडून उडवाउडवीची उत्तरे मिळाल्याचे फिर्यादीत नमूद करण्यात आले आहे. त्या
मुळे पोलिसांचा संशय अधिक बळावला.
पोलिसांच्या म्हणण्यानुसार, दोघेही सूर्यास्त ते सूर्योदयाच्या दरम्यान अंधाराचा फायदा घेत स्वतःचे अस्तित्व लपवून काहीतरी मालाविरुद्धचा गुन्हा करण्याच्या उद्देशाने संशयास्पदरीत्या फिरताना आढळून आले. त्यानंतर पंचांना बोलावून घटनास्थळी पंचनामा करण्यात आला.
महाराष्ट्र पोलीस कायद्याचा दणका!
या प्रकरणी पोलीस कॉन्स्टेबल भाऊसाहेब दौलत पवार यांनी सरकारतर्फे फिर्याद दिली. त्यावरून शिर्डी पोलीस ठाण्यात FIR क्रमांक ०७८२/२०२६ दाखल करण्यात आला असून, दोघांविरुद्ध महाराष्ट्र पोलीस अधिनियम कलम १२२ व १२४ अन्वये कारवाई करण्यात आली आहे.
साईनगरीत रात्रीच्या वेळी संशयास्पद हालचाली करणाऱ्यांवर पोलिसांची करडी नजर असल्याचे या कारवाईतून स्पष्ट झाले आहे. प्रकरणाचा पुढील तपास शिर्डी पोलीस करीत आहेत.
