शिर्डी : ग्राहक उपभोक्ता संरक्षण समितीच्या वतीने सामाजिक कार्य, ग्राहक हक्क आणि उपभोक्ता संरक्षणाच्या क्षेत्रात काम करण्यासाठी शिर्डी येथील भगवान दगडू थोरात यांची राहाता तालुका प्रवक्तेपदी नियुक्ती करण्यात आली आहे.
समितीचे उत्तर महाराष्ट्र अध्यक्ष व पदाधिकाऱ्यांच्या सहमतीने दिनांक १ सप्टेंबर २०२६ रोजी नियुक्तीपत्र देण्यात आले. ही नियुक्ती ३१ डिसेंबर २०२७ पर्यंत करण्यात आली आहे.
ग्राहक संरक्षण कायद्याबाबत जनजागृती करणे, ग्राहकांना त्यांच्या अधिकारांची माहिती देणे तसेच तालुका, वॉर्ड व गावपातळीवर समितीच्या शाखांची निर्मिती करण्यासाठी कार्य करणे, अशी जबाबदारी थोरात यांच्यावर सोपविण्यात आली आहे.
समितीच्या माध्यमातून प्रशिक्षण व विविध शिबिरांचे आयोजन करून सरकारी, निमशासकीय, खासगी आणि सहकारी क्षेत्रातील ग्राहक संरक्षणाशी संबंधित कायदेशीर बाबींची माहिती पदाधिकाऱ्यांना देण्यात येणार असल्याचे नियुक्तीपत्रात नमूद करण्यात आले आहे.
ग्राहकांच्या प्रश्नांना वाचा फोडण्यासह ‘जागो ग्राहक जागो’ या संकल्पनेच्या माध्यमातून जनजागृती करण्यासाठी आपण कार्यरत राहणार असल्याचे भगवान थोरात यांनी सांगितले.
