तिघांना न्यायालयात हजर केले; एक दिवसाची पोलीस कोठडी
एलसीबीने केलेल्या तीन स्वतंत्र कारवायांमध्ये प्रतिबंधित गुटखा व तंबाखूजन्य पदार्थांचा साठा जप्त केल्यानंतर तिन्ही आरोपींना पोलिसांनी ताब्यात घेतले. संबंधित आरोपींविरुद्ध कायदेशीर प्रक्रिया पूर्ण करून त्यांना रविवारी न्यायालयासमोर हजर करण्यात आले.
या वेळी पोलिसांनी न्यायालयात आरोपींकडून जप्त करण्यात आलेल्या प्रतिबंधित तंबाखूजन्य पदार्थांचा मुद्देमाल, कारवाईची पार्श्वभूमी आणि गुप्त माहितीच्या आधारे करण्यात आलेल्या तपासाची माहिती सादर केली. तसेच हा माल नेमका कुठून आणण्यात आला, त्याचा पुरवठा कोण करीत आहे, शिर्डी परिसरातील आणखी कोणकोणत्या ठिकाणी प्रतिबंधित गुटख्याची विक्री अथवा साठवणूक केली जाते, याचा तपास करणे आवश्यक असल्याने आरोपींची पोलीस कोठडी देण्याची मागणी करण्यात आली.
या कारवाईमागील पुरवठा साखळीचा तपास, मालाचा स्रोत, वितरण करणारे व्यक्ती आणि या अवैध व्यवसायात आणखी कोणाचा सहभाग आहे का, याबाबत माहिती मिळविण्यासाठी पोलिसांना आरोपींची कोठडी आवश्यक असल्याचा युक्तिवाद करण्यात आला.
पोलिसांचा युक्तिवाद ऐकल्यानंतर न्यायालयाने तिन्ही आरोपींना एक दिवसाची पोलीस कोठडी (पीसी) सुनावली.
त्यामुळे आता या एक दिवसाच्या पोलीस कोठडीत आरोपींकडून मिळणाऱ्या माहितीतून गुटखा पुरवठ्याचे धागेदोरे कुठपर्यंत पोहोचतात, याकडे लक्ष लागले आहे. विशेषतः शिर्डीत प्रतिबंधित गुटख्याचा मोठ्या प्रमाणावर पुरवठा कोण करतो आणि या व्यवसायामागे आणखी कोण व्यक्ती आहेत का, याचा उलगडा होण्याची शक्यता आहे.
एलसीबीच्या सलग तीन कारवायांनंतर आता केवळ किरकोळ विक्रेत्यांवर कारवाई न करता प्रतिबंधित गुटख्याच्या मूळ पुरवठादारापर्यंत पोहोचण्याचे आव्हान पोलिसांसमोर आहे.
तपास हेड कॉन्स्टेबल लांडे व
हेड कॉन्स्टेबल चव्हाण हे करीत आहेत
