शिर्डी | प्रतिनिधी
सोन्याचा मोह नाही, कर्तव्याची जाणीव मोठी! श्री साईबाबा संस्थानच्या संरक्षण विभागातील कर्मचारी श्री. भाऊसाहेब लहानू दिघे यांनी आपल्या प्रामाणिकपणातून संस्थानच्या सेवेत असलेल्या कर्मचाऱ्यांच्या संस्कारांची पुन्हा एकदा प्रचिती दिली आहे.
श्री साईबाबा संस्थानच्या समाधी मंदिरात कर्तव्य बजावत असताना सुरक्षा कर्मचारी श्री. भाऊसाहेब दिघे यांना एक सोन्याची अंगठी आढळून आली. सदर अंगठीचे वजन ३.९६० ग्रॅम असून तिची अंदाजे किंमत ५० हजार रुपये आहे.
मात्र, हातात आलेल्या सोन्याच्या अंगठीचा कोणताही मोह न बाळगता श्री. दिघे यांनी ती तत्काळ संस्थानच्या संरक्षण कार्यालयात जमा केली. त्यांच्या या कृतीतून कर्तव्यनिष्ठा, प्रामाणिकपणा आणि साईसेवेची भावना दिसून आली.
संस्थानच्या कर्मचाऱ्यांच्या प्रामाणिकपणाची परंपरा कायम
श्री साईबाबांच्या पावन भूमीत सेवा करण्याचे भाग्य लाभलेल्या संस्थानच्या कर्मचाऱ्यांकडून वेळोवेळी अशा प्रामाणिकपणाचे दर्शन घडते. भाविकांच्या हरवलेल्या मौल्यवान वस्तू स्वतःकडे न ठेवता त्या संस्थानच्या कार्यालयात जमा करण्याची ही भावना निश्चितच कौतुकास्पद आहे.
‘साईंच्या दरबारात सेवा म्हणजे केवळ नोकरी नव्हे, तर एक जबाबदारी आणि श्रद्धेची सेवा आहे,’ याचीच जणू प्रचिती श्री. दिघे यांच्या कृतीतून आली आहे.
श्री साईबाबा संस्थानचे मुख्य कार्यकारी अधिकारी मा. श्री. गोरक्ष गाडीलकर आणि उपमुख्य कार्यकारी अधिकारी मा. श्री. भीमराज दराडे यांनी श्री. भाऊसाहेब दिघे यांच्या प्रामाणिकपणाचे कौतुक करून त्यांचे अभिनंदन केले.
सोन्याची किंमत ५० हजार रुपये असली, तरी त्यापेक्षा मोठी किंमत श्री. दिघे यांच्या प्रामाणिकपणाची आहे, अशी भावना या घटनेनंतर व्यक्त होत आहे.
