शिर्डी | प्रतिनिधी |
जगाला श्रद्धा आणि सबुरीचा संदेश देणाऱ्या साईबाबांच्या चरणी पालघर जिल्ह्यातील वसई येथील दानशूर साईभक्त काशिनाथ गोविंद पाटील यांनी तब्बल शंभर कोटी रुपयांच्या दोन भव्य इमारती दान केल्या होत्या. मात्र या दानाचा योग्य वापर न झाल्याने गेली आठ वर्षे या बहुमजली इमारती वापराविना धूळखात पडल्या आहेत, हे विदारक वास्तव आता समोर आले आहे.
११ मे २०१७ रोजी हस्तांतर; हेतू महान पण प्रत्यक्षात अपयश
११ मे २०१७ रोजी सर्व सोयीसुविधांसह या दोन इमारती विनामोबदला दानपत्राद्वारे साईबाबा संस्थानकडे हस्तांतरित करण्यात आल्या होत्या.
एमपीएससी व यूपीएससी विद्यार्थ्यांसाठी अकॅडमी, साईभक्तांसाठी निवास, भोजन व सांस्कृतिक उपक्रम राबवण्याचा उदात्त हेतू या दानामागे होता. मात्र संस्थानच्या उदासीन धोरणामुळे या इमारतींच्या मूळ हेतूलाच केराची टोपली दाखवण्यात आली, अशी तीव्र प्रतिक्रिया साईभक्तांमधून व्यक्त होत आहे.
६४ ते २०० खोल्या; शंभर कोटींची संपत्ती निष्क्रिय
शिर्डी लगतच्या साई निवारा परिसरात असलेल्या या दोन भव्य इमारती पाच ते सहा मजली असून —
▪️ पहिल्या इमारतीत ६४ खोल्या, क्षेत्रफळ २६३३.७६ चौरस मीटर
▪️ दुसऱ्या इमारतीत २०० खोल्यांची व्यवस्था, क्षेत्रफळ ७१४८ चौरस मीटर
▪️ दोन्ही इमारतींची आजची एकूण किंमत सुमारे शंभर कोटी रुपये
असे असूनही या इमारती आठ वर्षांपासून वापरात न आणल्याने संस्थानच्या कार्यक्षमतेवर गंभीर प्रश्न उपस्थित झाले आहेत.
धाम मंदिर चॅरिटेबल ट्रस्ट कार्यरत; मात्र संस्थानचे दुर्लक्ष अक्षम्य
या परिसरातच असलेल्या धाम मंदिर चॅरिटेबल ट्रस्टच्या माध्यमातून मोफत निवास, भोजन आणि सांस्कृतिक उपक्रम नियमितपणे राबवले जात आहेत. अशा ठिकाणी असलेल्या दोन भव्य इमारतींकडे संस्थानने केलेले दुर्लक्ष अक्षम्य असल्याची भावना साईभक्तांमध्ये तीव्र झाली आहे.
दानशूर भक्ताने दूरदृष्टीने दिलेले दान सत्कारणी लावण्यात संस्थान अपयशी ठरल्याचे चित्र सध्या दिसून येत आहे.
दानशूर भक्ताची तयारी; अपूर्ण कामे स्वखर्चाने पूर्ण करण्याची तयारी दर्शवली
महत्त्वाचे म्हणजे, काशिनाथ गोविंद पाटील यांनी बांधकामातील काही अपूर्ण राहिलेली कामे स्वखर्चाने पूर्ण करून देण्याची तयारी दर्शवली होती.
तरीही संस्थानकडून ठोस निर्णय न झाल्याने या इमारतींचा प्रश्न प्रलंबितच राहिला आहे. जवळपास २० एकर परिसरात असलेल्या या वास्तूंना प्रत्यक्ष वापरात आणण्याची मागणी आता जोर धरू लागली आहे.
संस्थानचा खुलासा; प्रस्ताव मंजूर, लवकर अंमलबजावणीचे आश्वासन
दरम्यान, याबाबत प्रतिक्रिया देताना साईबाबा संस्थानचे मुख्य कार्यकारी अधिकारी गोरक्ष गाडीलकर म्हणाले,
“दानशूर साईभक्ताने दिलेल्या इमारतींचा चांगल्या पद्धतीने उपयोग व्हावा, यासाठी साईबाबा संस्थान वचनबद्ध आहे. स्वयंरोजगार व ट्रेनिंग सेंटरसाठी या इमारतींचा वापर करण्याबाबत त्रिसदस्य समितीने प्रस्ताव मंजूर केला असून, लवकरच त्याची अंमलबजावणी केली जाईल.”
साईभक्तांची अपेक्षा; दानाला न्याय कधी?
आता प्रश्न एकच आहे —
आठ वर्षांपासून धूळखात पडलेल्या शंभर कोटींच्या इमारतींना प्रत्यक्ष उपयोग कधी मिळणार?
साईभक्तांच्या अपेक्षा, दानशूर भक्ताची भावना आणि साईबाबांच्या शिकवणीला न्याय देण्यासाठी संस्थान ठोस पावले कधी उचलेल, याकडे संपूर्ण साईभक्तांचे लक्ष लागले आहे.
