अहिल्यानगर | प्रतिनिधी
अहिल्यानगर शहरात अवैधरित्या नशेचे इंजेक्शन व औषधी बॉटल्या विक्री करणाऱ्या इसमावर स्थानिक गुन्हे शाखा, अहिल्यानगर यांनी छापा टाकून ११,६१३ रुपये किमतीचा मुद्देमाल जप्त केला असून, या कारवाईत एक आरोपी अटकेत घेण्यात आला आहे.
अहिल्यानगर जिल्ह्यात नशेचे इंजेक्शन व प्रतिबंधित औषधांची अवैध विक्री रोखण्याबाबत पोलीस अधीक्षक मा. श्री. सोमनाथ घार्गे यांनी स्पष्ट आदेश दिले होते. त्या अनुषंगाने पोलीस निरीक्षक श्री. किरणकुमार कबाडी (स्थानिक गुन्हे शाखा) यांच्या मार्गदर्शनाखाली विशेष पथक तयार करून कारवाई करण्यात आली.
दि. २३ जानेवारी २०२६ रोजी रात्री २ वाजण्याच्या सुमारास, सिद्धेश्वर मंदिर परिसर, बागडपट्टी, अहिल्यानगर येथे रोहित रघुनाथ वंगार (वय २५, रा. बागडपट्टी) हा इसम डॉक्टरच्या चिठ्ठीशिवाय विक्रीस प्रतिबंधित असलेली नशेची इंजेक्शन्स व औषधे विक्रीसाठी जवळ बाळगून थांबलेला असल्याची गोपनीय माहिती पथकाला मिळाली.
त्या आधारे पथकाने सापळा रचून सदर इसमास ताब्यात घेतले. पंचासमक्ष झडती घेतली असता नशेसाठी वापरल्या जाणाऱ्या एकूण ३७ औषधी बॉटल्या असा ११,२९९ रुपये किमतीचा मुद्देमाल जप्त करण्यात आला. यासह इतर साहित्य मिळून एकूण ११,६१३ रुपयांचा मुद्देमाल पोलिसांनी जप्त केला आहे.
या प्रकरणी पोहेकॉ/१६४ गणेश शिवनाथ लबडे यांनी दिलेल्या फिर्यादीवरून तोफखाना पोलीस स्टेशन येथे गुन्हा रजिस्टर नंबर ५०/२०२६ भारतीय न्याय संहिता २०२३ मधील कलम १२३, १२५, २७८ अन्वये गुन्हा दाखल करण्यात आला असून, पुढील तपास तोफखाना पोलीस स्टेशन करीत आहे.
ही कारवाई पोलीस अधीक्षक मा. श्री. सोमनाथ घार्गे यांच्या मार्गदर्शनाखाली स्थानिक गुन्हे शाखेचे पोलीस अधिकारी व अंमलदार यांनी यशस्वीरीत्या पार पाडली.
