साईचरणी भावनिक साकडे : सुनीता आहुजांचं शिर्डीत दर्शन
प्रसिद्ध अभिनेते गोविंदा यांच्या पत्नी सुनीता आहुजा यांनी आज आपल्या आईसह श्रीक्षेत्र शिर्डीत येऊन साईबाबांच्या समाधीचे दर्शन घेतले. यावेळी त्यांनी साईचरणी कुटुंबाच्या सुख-शांतीसाठी प्रार्थना करत, नववर्षात पती गोविंदा घरी परत यावेत, असे भावनिक साकडे घातले.
‘गतवर्ष वाईट गेलं, पण साईच्या आशीर्वादानं नववर्ष चांगलं जाईल’
दर्शनानंतर माध्यमांशी बोलताना सुनीता आहुजा म्हणाल्या, “गतवर्ष आमच्यासाठी खूप वाईट गेले. मी कधीच खोटं बोलत नाही. मात्र साईबाबांच्या कृपेने हे नवीन वर्ष आमच्या परिवारासाठी सुखाचे, निरोगी आणि आनंदाचे जाईल, असा मला पूर्ण विश्वास आहे.”
दर्शनानंतर मनाला समाधान आणि शांती मिळाल्याची भावना त्यांनी व्यक्त केली.
गोविंदासाठी विशेष प्रार्थना : ‘सद्बुद्धी मिळो, हिरोची इमेज परत मिळो’
पती गोविंदाबाबत सुरू असलेल्या विविध चर्चांवर बोलताना सुनीता आहुजा म्हणाल्या की, “गोविंदासाठीही हे वर्ष चांगले जावे. साईबाबांनी त्यांना सद्बुद्धी द्यावी. त्यांनी योग्य तेच काम करावे आणि पुन्हा एकदा आपली हिरोची प्रतिमा मिळवावी,” अशी प्रार्थना आपण साईचरणी केली असल्याचे त्यांनी सांगितले.
घटस्फोट व अफेअरच्या चर्चांवर परखड भूमिका
गोविंदा व सुनीता आहुजा यांच्या घटस्फोटाच्या चर्चांवर प्रतिक्रिया देताना त्या म्हणाल्या,
“घटस्फोटाच्या चर्चा गोविंदाला शोभत नाहीत. जो कोणी माझं घर तोडण्याचा प्रयत्न करतोय, त्याला साईबाबा कधीच माफ करणार नाहीत.”
गोविंदाच्या एका अभिनेत्रीबरोबर अफेअरच्या चर्चांवर त्या म्हणाल्या, “ती मुलगी फक्त पैशासाठी त्यांच्यासोबत आहे. चाळीस वर्षांचा संसार कोणतीही तोडू शकत नाही. साईबाबा आमच्या पाठीशी आहेत.”
‘मुलांनी स्वतःच्या हिंमतीवर नाव कमवावं’
मुलांच्या भविष्याबाबत बोलताना सुनीता आहुजा म्हणाल्या, “मी स्वतःच्या हिंमतीवर नाव कमावले आहे. आजही लोक मला गोविंदाची बायको म्हणून ओळखतात, मात्र सोशल मीडियावर मी आजही ‘सुनीता आहुजा’ आहे. माझ्या मुलांनीही स्वतःच्या मेहनतीवर चित्रपटसृष्टीत नाव कमवावे. त्यांना कोणतीही मदत केली जात नाही.”
‘कुटुंबापेक्षा मोठं काहीच नाही’ – सुनीता आहुजा
शेवटी त्या म्हणाल्या, “परमेश्वराने गोविंदाला सद्बुद्धी द्यावी. त्यांनी स्वतःमध्ये सुधारणा करून कुटुंबाकडे लक्ष द्यावे. कुटुंबापेक्षा मोठं काहीच नाही. लोक पैशासाठी येतात-जातात, पण कुटुंबीयांचं प्रेम मनापासून असतं. गोविंदाने दर्जेदार, संस्कार देणारे चित्रपट करावेत, जे संपूर्ण कुटुंब एकत्र बसून पाहू शकेल,” अशी अपेक्षाही त्यांनी व्यक्त केली.
