शिर्डी : श्री साईबाबांवर देश-विदेशातील लाखो भाविकांची अढळ श्रद्धा असून भक्तिभावाने भाविक विविध प्रकारच्या मौल्यवान देणग्या श्री साईचरणी अर्पण करत असतात. या श्रद्धेचाच प्रत्यय आज पुन्हा एकदा आला.
पंजाब राज्यातील भटींडा येथील साईभक्त श्री अजय कुमार यांनी श्री साईबाबांच्या चरणी २०० ग्रॅम वजनाचा आकर्षक नक्षीकाम असलेला सुवर्ण मुकुट अर्पण केला. या सुवर्ण मुकुटाची अंदाजे किंमत २९ लाख १९ हजार ८०० रुपये इतकी आहे.
सदर मुकुट श्री साईबाबा संस्थानचे उपमुख्य कार्यकारी अधिकारी श्री भिमराज दराडे यांच्याकडे सुपूर्द करण्यात आला. यावेळी संस्थानच्या वतीने श्री दराडे यांनी श्री अजय कुमार यांचा सत्कार करून त्यांच्या भक्तीभावाचे कौतुक केले व आभार व्यक्त केले.
याचबरोबर आज आणखी एका साईभक्ताने सुमारे ५ लाख ४० हजार १६३ रुपये किंमतीचा आकर्षक नक्षीकाम केलेला सोन्याचा ब्रोच श्री साईचरणी अर्पण केला. संबंधित साईभक्तांच्या विनंतीनुसार त्यांचे नाव गोपनीय ठेवण्यात आले आहे.
श्री साईबाबांच्या चरणी अर्पण होणाऱ्या अशा मौल्यवान देणग्या केवळ आर्थिक मूल्यामुळे महत्त्वाच्या नसून, त्या भक्तांच्या श्रद्धा, विश्वास आणि साईसेवेप्रती असलेल्या समर्पणाचे प्रतीक मानल्या जातात. देशाच्या कानाकोपऱ्यातून तसेच विदेशातूनही भाविक मोठ्या श्रद्धेने शिर्डीत येऊन साईचरणी आपली कृतज्ञता व्यक्त करत असतात.
