शिर्डी : साईनगरीत आरोग्यसेवेच्या उन्नतीसाठी कॅनरा बँकेने सामाजिक बांधिलकीचे प्रेरणादायी उदाहरण घालून दिले आहे. बँकेच्या कॉर्पोरेट सोशल रिस्पॉन्सिबिलिटी (CSR) उपक्रमांतर्गत श्री साईबाबा हॉस्पिटलला तब्बल ३५ लाख रुपये किंमतीचे दोन अत्याधुनिक व्हेंटिलेटर देणगी स्वरूपात प्रदान करण्यात आले. या महत्त्वपूर्ण मदतीमुळे गंभीर रुग्णांच्या उपचारासाठी हॉस्पिटलची क्षमता अधिक सक्षम झाली आहे.
या व्हेंटिलेटर मशीनचे विधिवत पूजन श्री साईबाबा संस्थानचे मुख्य कार्यकारी अधिकारी श्री. गोरक्ष गाडीलकर (भा.प्र.से.) तसेच कॅनरा बँकेचे मुख्य हेड ऑफिसर प्रमोद कुमार सिंग यांच्या हस्ते करण्यात आले. या प्रसंगी उपमुख्य कार्यकारी अधिकारी श्री. भीमराज दराडे यांचीही प्रमुख उपस्थिती होती. कार्यक्रमात उपस्थित सर्व मान्यवरांनी या उपक्रमाचे कौतुक करत कॅनरा बँकेच्या सेवाभावी दृष्टिकोनाला दाद दिली.
यावेळी कॅनरा बँकेचे रिजनल ऑफिसर अनिल कुमार, नागपूर रिजनचे सुरेंद्र भाऊ, मॅनेजर उमेश शेटे व चंद्रशेखर सोनी यांच्यासह बँकेचे अधिकारी उपस्थित होते. तसेच श्री साईबाबा हॉस्पिटलचे वैद्यकीय संचालक डॉ. प्रीतम वडगावे, सहाय्यक आधीसेविका मंदा थोरात, जनसंपर्क अधिकारी सुरेश टोलमारे, तसेच हॉस्पिटलमधील डॉक्टर व कर्मचारी मोठ्या संख्येने उपस्थित होते.
या अत्याधुनिक व्हेंटिलेटरमुळे आयसीयू विभाग अधिक सक्षम होणार असून, अपघातग्रस्त, श्वसनविकार असलेले रुग्ण तसेच अतिदक्षता उपचारांची गरज असलेल्या रुग्णांना तात्काळ आणि परिणामकारक उपचार देणे शक्य होणार आहे. विशेषतः आपत्कालीन परिस्थितीत या उपकरणांची भूमिका अत्यंत महत्त्वाची ठरणार आहे.
श्री साईबाबा संस्थानच्या वतीने कॅनरा बँकेचे आभार व्यक्त करण्यात आले. “अशा प्रकारच्या सामाजिक उपक्रमांमुळे आरोग्य सेवा अधिक सक्षम होते आणि गरजू रुग्णांना मोठा दिलासा मिळतो,” असे मत यावेळी व्यक्त करण्यात आले.
आजच्या काळात आरोग्य सुविधा अधिक बळकट करण्याची गरज अधोरेखित होत असताना, कॅनरा बँकेने दिलेली ही मदत केवळ उपकरणांची देणगी नसून, ती अनेक गरजू रुग्णांसाठी जीवनदान ठरणारी ठरेल, असा विश्वास व्यक्त करण्यात येत आहे.
👉 सेवाभाव, सामाजिक जबाबदारी आणि रुग्णसेवा यांचा सुंदर संगम — कॅनरा बँकेचा हा उपक्रम खऱ्या अर्थाने प्रेरणादायी!
