शिर्डी : साईनगरीत होळीचा स्थानिक उत्सव भक्तीभाव आणि पारंपरिक उत्साहात साजरा करण्यात आला. श्री साईबाबा संस्थान विश्वस्तव्यवस्था च्या वतीने आयोजित या सोहळ्याला ग्रामस्थ व साईभक्तांची मोठी उपस्थिती लाभली.
🔥 गुरूस्थान मंदिरासमोर विधीवत पूजन
उत्सवाची सुरुवात श्री गुरूस्थान मंदिरासमोर पारंपरिक पद्धतीने करण्यात आली. संस्थानचे मुख्य कार्यकारी अधिकारी गोरक्ष गाडीलकर व त्यांच्या सुविद्य पत्नी सौ. वंदना गाडीलकर यांच्या हस्ते होळीची विधीवत पूजा करून होळी प्रज्वलित करण्यात आली. मंत्रोच्चार आणि टाळ-मृदंगाच्या निनादात वातावरण भक्तिमय झाले होते.
🙏 मान्यवरांची उपस्थिती
या प्रसंगी उप मुख्य कार्यकारी अधिकारी भिमराज दराडे, प्रशासकीय अधिकारी संदीपकुमार भोसले, अतुल वाघ, मंदिर विभाग प्रमुख विष्णु थोरात, मंदिर पुजारी तसेच शिर्डी ग्रामस्थ मोठ्या संख्येने उपस्थित होते. सर्वांनी एकत्र येत सामाजिक ऐक्य आणि परंपरेचे जतन करण्याचा संदेश दिला.
🌈 भक्ती, परंपरा आणि एकतेचा संदेश
होळी हा केवळ रंगांचा नव्हे तर सद्भावना, बंधुभाव आणि वाईटावर चांगल्याच्या विजयाचा सण आहे. साईबाबांच्या पवित्र नगरीत साजरा झालेला हा उत्सव भक्तांना एकात्मतेचा आणि सकारात्मकतेचा संदेश देणारा ठरला. साईचरणी प्रार्थना करत सर्वांनी समाजात सौहार्द आणि शांतता नांदावी, अशी भावना व्यक्त केली.
