शिर्डी | प्रतिनिधी :
शिर्डी नगरपरिषदेमार्फत स्वच्छ भारत मिशन (नागरी) २.० व माझी वसुंधरा अभियान ६.० अंतर्गत आयोजित करण्यात आलेल्या ‘श्रीगणेशोत्सव पर्यावरणपूरक सजावट स्पर्धा २०२५’ मध्ये सन्मित्र युवक गणेश मित्र मंडळाने उत्स्फूर्त सहभाग घेत उत्कृष्ट कामगिरी करत संयुक्त प्रथम क्रमांकाचे पारितोषिक पटकाविले आहे.
या स्पर्धेत मंडळाने पर्यावरणपूरक गणेशमूर्ती, सामाजिक उपक्रम, स्वच्छता अभियान, अक्षय ऊर्जेचा वापर, शिस्तबद्ध नियोजन, आकर्षक व पर्यावरणस्नेही सजावट, हरित शपथ तसेच कृत्रिम तलावात गणेश विसर्जन यासारख्या उपक्रमांची प्रभावी अंमलबजावणी करून परीक्षकांची विशेष दाद मिळवली.
या उल्लेखनीय कार्याची दखल घेत शिर्डी नगरपरिषदेच्या वतीने सन्मित्र युवक गणेश मित्र मंडळास प्रशस्तीपत्र प्रदान करण्यात आले. या प्रसंगी सन्मित्र मंडळाचे सर्वस्वी मार्गदर्शक व प्रेरणास्थान गजानन शेरवेकर यांच्या हस्ते पारितोषिक प्रदान करण्यात आले.
पर्यावरण रक्षणाचा संदेश समाजात पोहोचवण्याचे कार्य सन्मित्र युवक गणेश मित्र मंडळाने केले असून, नगरपरिषद शिर्डीने मंडळाच्या कार्याबद्दल अभिमान व्यक्त केला आहे. हा सन्मान इतर गणेश मंडळांसाठी प्रेरणादायी ठरणार आहे.
