शिर्डी : श्री साईबाबा संस्थान विश्वस्तव्यवस्थेच्या साई धर्मशाळा भक्तनिवास परिसरात सुरक्षा रक्षकांना एक बेवारस होंडा शाईन मोटारसायकल आढळून आली. विशेष म्हणजे, वाहनाचा आर.टी.ओ. क्रमांक तपासला असता तो बनावट असल्याचे निदर्शनास आले. मात्र, संस्थानच्या सुरक्षा विभागाने सतर्कता दाखवत इंजिन आणि चेसिस क्रमांकाच्या आधारे तपास करून मोटारसायकलच्या मूळ मालकाचा शोध लावला.
साई धर्मशाळा भक्तनिवास परिसरात बेवारस अवस्थेत आढळून आलेल्या या दुचाकीचा क्रमांक संशयास्पद वाटल्याने सुरक्षा विभागाने त्याची पडताळणी केली. तपासामध्ये वाहनावरील आर.टी.ओ. क्रमांक बनावट असल्याचे स्पष्ट झाल्यानंतर सुरक्षा विभागाने पुढील तपास सुरू केला.
वाहनावरील इंजिन क्रमांक आणि चेसिस क्रमांकाच्या आधारे करण्यात आलेल्या तपासातून मोटारसायकलच्या मूळ मालकाची माहिती मिळविण्यात आली. त्यानुसार आडगाव पोलीस स्टेशन, नाशिक यांच्या माध्यमातून सदर वाहनाचे मूळ मालक गणेश प्रकाश बांदे, रा. नांदूर गाव, नाशिक यांच्याशी संपर्क साधण्यात आला.
यानंतर गणेश बांदे हे शिर्डी येथे उपस्थित झाल्यानंतर आवश्यक ती ओळख तसेच वाहनाच्या मालकीची खात्री करण्यात आली. सर्व पडताळणी पूर्ण झाल्यानंतर संबंधित होंडा शाईन मोटारसायकल सुरक्षितपणे मूळ मालकाच्या ताब्यात देण्यात आली.
सुरक्षा विभागाच्या सतर्कतेचे कौतुक
बनावट नंबर असलेल्या बेवारस वाहनाचा इंजिन आणि चेसिस क्रमांकाच्या आधारे मूळ मालकापर्यंत पोहोचत वाहन परत करण्याच्या संस्थानच्या सुरक्षा विभागाच्या कार्यवाहीचे कौतुक होत आहे.
आपली मोटारसायकल सुरक्षितपणे परत मिळाल्याबद्दल गणेश प्रकाश बांदे यांनी श्री साईबाबा संस्थान विश्वस्तव्यवस्थेचे तसेच सुरक्षा विभागाचे आभार व्यक्त केले.
