साई मंदिरात सापडली सोन्याची अंगठी; सुरक्षा कर्मचाऱ्याने दाखविली प्रामाणिकता
शिर्डी : श्री साईबाबांच्या समाधी मंदिरात कर्तव्य बजावत असताना श्री साईबाबा संस्थानच्या संरक्षण विभागातील सुरक्षा कर्मचारी श्री. लक्ष्मण घोरपडे यांना सोन्याची अंगठी आढळून आली. विशेष म्हणजे, सदर अंगठी स्वतःकडे न ठेवता त्यांनी ती तत्काळ प्रामाणिकपणे संरक्षण कार्यालयात जमा केली.
सापडलेल्या सोन्याच्या अंगठीचे वजन ३.२०० ग्रॅम असून तिची अंदाजे किंमत ४८ हजार रुपये आहे. सध्या सोन्याचे दर मोठ्या प्रमाणात वाढलेले असतानाही घोरपडे यांनी दाखविलेली प्रामाणिकता आणि कर्तव्यनिष्ठा कौतुकास्पद ठरली आहे.
साई मंदिरात सेवा, प्रामाणिकतेची परंपरा कायम!
श्री साईबाबांच्या पावन समाधी मंदिरात देश-विदेशातून दररोज हजारो भाविक दर्शनासाठी येतात. अशा परिस्थितीत भाविकाची मौल्यवान वस्तू सापडल्यानंतर ती तातडीने संस्थानच्या कार्यालयात जमा करण्याची कृती ही संस्थानच्या कर्मचाऱ्यांमधील प्रामाणिकता, कर्तव्यनिष्ठा आणि सेवाभावाचे उत्तम उदाहरण असल्याची भावना व्यक्त होत आहे.
दरम्यान, सुरक्षा कर्मचारी लक्ष्मण घोरपडे यांच्या या उल्लेखनीय प्रामाणिकतेबद्दल श्री साईबाबा संस्थानचे मुख्य कार्यकारी अधिकारी मा. श्री. गोरक्ष गाडीलकर तसेच उपमुख्य कार्यकारी अधिकारी मा. श्री. भीमराज दराडे यांनी त्यांचे विशेष अभिनंदन करून त्यांच्या प्रामाणिक कार्याचे कौतुक केले.
