शिर्डी प्रतिनिधी : शिवसेना पक्षाच्या वर्धापन दिनानिमित्त शिर्डी येथे आयोजित करण्यात आलेला भव्य जल्लोष सोहळा उत्साहपूर्ण वातावरणात संपन्न झाला. कार्यक्रमाच्या प्रारंभी शिवसेना पदाधिकारी व शिवसैनिकांनी श्री साईबाबांच्या समाधीचे दर्शन घेत समाधीवर फुलांची चादर अर्पण करून पक्षाच्या वाटचालीसाठी आशीर्वाद घेतले.
शिर्डी येथील सिटी हार्ट हॉटेलमध्ये आयोजित करण्यात आलेल्या या सोहळ्यास संगमनेरचे आमदार मा. अमोल खताळ पाटील, नेवासाचे आमदार मा. विठ्ठलराव लंघे, माजी खासदार मा. सदाशिव लोखंडे, माजी आमदार मा. भानुदास मुरकुटे, माजी आमदार मा. भाऊसाहेब कांबळे, मा. सागर भैय्या बेग यांच्यासह शिवसेनेचे अनेक पदाधिकारी व कार्यकर्ते उपस्थित होते.
यावेळी पक्षाच्या गौरवशाली इतिहासाचा आढावा घेण्यात आला. संघटना बळकटीकरण, आगामी राजकीय वाटचाल आणि जनतेच्या प्रश्नांवर प्रभावीपणे लढा उभारण्यासाठी कार्यकर्त्यांनी सज्ज राहावे, असे आवाहन मान्यवरांनी केले.
शिर्डी लोकसभा मतदारसंघातील सहाही तालुक्यांमधून शिवसैनिक, महिला आघाडी, युवासेना तसेच विविध अंगीकृत संघटनांचे पदाधिकारी मोठ्या संख्येने उपस्थित होते. घोषणाबाजी आणि जल्लोषाने परिसर दणाणून गेला. यामुळे शिवसेनेची ताकद, एकजूट आणि पक्षनिष्ठा पुन्हा एकदा अधोरेखित झाली.
कार्यक्रमाच्या यशस्वी आयोजनासाठी जिल्हाप्रमुख कमलाकर कोते, जिल्हाप्रमुख नितीनराव औताडे व सर्व पदाधिकाऱ्यांनी विशेष परिश्रम घेतले. वर्धापन दिनानिमित्त आयोजित करण्यात आलेला हा सोहळा शिवसैनिकांमध्ये नवचैतन्य निर्माण करणारा आणि संघटनात्मक बळ वाढविणारा ठरला.
